Мартрал 3-нний «Дагестан» РИА-лий хьунни Дагъусттан Республикалийсса Федерал Антимонополиялул къуллугърал управлениялул пресс-конференция. Ванил тема дия «Актуальные вопросы антимонопольного регулирования в Республике Дагестан».
Пресс-конференциялий ххал бивгьунни региондалий антимонополиялул къуллугърацIун бавхIусса агьамми масъалартту.
Дагъусттан Республикалийсса Федерал антимонополиялул къуллугърал управлениялул каялувчи Кьагьир Бабаевлул бувсунни ДР-лул УФАС-рал 2024-ку шинал дурсса давурттал хIасиллая ва ялун дучIансса чIумуй данмуния. Хьунабакьаврий хъуннасса къулагъас дунни конкуренция дуруччаврил, монополиялул иширттал хьхьичIалу кьукьаврил ва бизнес-сообществалущалсса хIала-гьурттушиврул масъаларттах.
2024-ку шинал Дагъусттаннал УФАС-рал сукку дурну дур 11 дело «Закон о защите конкуренции» лиян даврихлу. Миннувасса 9 закондалул хIакъираву хIукмурду кьамул бувну бур, 2 дело дацIан дурну дур, закон лиян даву къаляркъуну. Дуллуну дур 4 бакIрай бацIан баву, ми цинярда бартдиргьуну дур.
Ларгсса шинал дурну дур 2 дюъ дишаву, миннувасса ца – МахIачкъалаллал администрациялийн.
Мукунна ларгсса шинал дурну дур 8 дюъ дишаву. Миннувату 5 дуллуну дур властьрал органнахьхьун, 4 – муниципал сакиншиннардахьхьун ва 1 – территориялул федерал органдалухьхьун.
Кьагьир Бабаевлул тIимунийну, 2024-ку шинал контрольданул циняв бутIравусса законну лиян давурттахлу управлениялул дирхьуну дур 69,3 млн къуруш аькIрал. Яла хъуними аькIри дирхьуну дур электроэнергиялул бутIувусса законну лиян даврихлу – 62 млн къурушраха лирчусса.
ПаччахIлугърал закупкардал бутIуву ххал бивгьуну бур 695 аьрза, миннувату 268 ккалли бувну бур хIуччардайну бацIан бувссаннун. Закупкардал бутIуву дурсса законну лиян давурттахлу дирхьуну дур 5,2 млн къуруш аькIрал.
Рекламалул хIакъиравусса аьмсса контрольданул ва законодательствалул бутIуву Дагъусттаннал УФАС-рал 2024-ку шинал сукку дурну дур 30 дело, ашкара дурну дур 29 закон лиян даву.
Пресс-конференциялул ахирданий Кьагьир Бабаевлул жавабру дуллунни журналистътурал суаллахьхьун.
