Февральданул 25-нний Каспийскалий Аьли Аьлиевлул цIанийсса Спортрал ва жагьилтурал къатраву байбивхьунни агропромышленностьрал форум «Даг Агро Каспий». Выставкалий шяраваллил хозяйствалуву цалла дуккан дуллалимур ккаккиялун дирхьуну дур Аьрасатнал регионнавасса, Азирбижаннавасса, Турциянавасса, Китайнавасса, Шри-Ланкалиясса ва Япониянавасса 100-нниха лирчусса компаниярттал.
Шикку кIул хьун бюхълай бур къалмул, аьгъушиврул ххяххиярттал ва нувщул селекциялул цIушиннардащал, аьрщи гъай чайсса, хъуру дугьайсса, ярма хIадур байсса техникалущал, оьргъашивурттащал, ххяххияртту зиянчитурая дуруччайсса затирттащал, инновациялул агрохимиялущал.
Выставка тIитIаврий гьуртту хьунни АьФ-лул ПаччахIлугърал Думалул депутат, «Теплицы России» Ассоциациялул президент Алексей Ситников, Дагъусттаннал ХIукуматрал председательнал хъиривчу Нариман АьбдулмутIалибов, ДР-лул шяраваллил хозяйствалул ва бакIлахъиялул министр Мухтарбий Аджеков, «Теплицы Дагестана» ассоциациялул каялувчи Арсен Жамалуттинов.
Выставка лахъи ларгссар февральданул 26-ннийнин, ванил хIасиллая бусанну хъиривмур номерданий.
ХIасан Аьдилов
