Итникьини «Азимут» отельданул конференц-залдануву хьунни Дагъусттан Республикалул ЗахIматрал ва соцразвитиялул министерствалул ларгсса шинал хIасиллу дуллалисса пресс-конференция.
Му дайдирхьунни 2024-ку шинал лажиндарай ведомствалул дурсса давурттаясса хъун дакъасса видеоролик ккаккан даврийну. Ларгсса шинал хIасиллу дуллай, захIматрал ва соцразвитиялул министр МахIаммадзагьид Кихасуровлул бувсунни ва шинаву ведомствалул хьхьичI бивхьусса мурадирттаятугу.
Министрнал кIицI лавгунни ларгсса шинал хасъсса къулагъас дурну душиву чIявусса оьрчIру бусса кулпатирттах, хасъсса аьралий операциялий арсру ва ласру талатисса кулпатирттан кумаг баврих.
Дурну дур Кулпатрал шинан хас дурсса мероприятияртту. Аьрасатнаву цалчин жула министерствалул дурну дур хасъсса аьралий операциялий гьуртту хъанахъиминнал регионал конференция «Герои нашего времени».
ЗахIматрал ва соцразвитиялул министерствалучIа зузисса Агьалинал социал иширтталсса буллалисса центрдал меценатътуращал цачIуну бувну бур 16 азара инсаннан кумагрансса ихIсандалул акция.
Му бакъассагу, 2024-ку шинал социал выплатарттан итадаркьуну дур 2 млрд. къуруширттал.
Министрнал бусаврийн бувну, Минтрудрал МахIачкъалаливсса Республикалул азарханалущал дурсса кьутIилийн бувну, ххал диргьуну дур ахIвал кIюласса чIявусса оьрчIру бусса кулпатирттавасса 100 оьрчIал цIуллу-сагъшиврул тагьар.
«Демография» нацпроектрал лагрулий тIурча, цIуллу-сагъшиву дуруччаврил идарарттайн иян увну ур оьрмулул угьарасса ва мушакъатсса 7 азара инсан.
Муххал ххуллул азарханалущал чирчуну дур хасъсса аьралий операциялий жанну дуллуминнал кулпатирттан медициналул хIаллихшиннарду дуллансса кьутIи. Кихасуровлул мукунма кIицI лавгунни министерствалул идарарттал кумаг буллай бивкIшиву ва гихунмайгу буллан дакIний бушиву хасъсса аьралий операциялий гьуртту хъанахъиминнал кулпатирттан (дукиялийнусса ва ичIаллил буруккинтту щаллу баврийну). «Доступная среда» программа зузаврия буслай, министрнал кIицI лавгунни республикалий реабилитациялул матахIрал дузал бувну бушиву 23 идара. «Социальный контракт» чирчуну дур 5 азара инсаннал, миннан итадаркьуну дур миллиард къуруширттал. Давурттал дузал увну ур 18 азара инсан.
Ттурша инсаннан дуллуну дур къатри ласунсса ягу ичIаллил шартIру къулай дансса сертификатру. Ми дуллуну дур Авгъаннал дяъвилий гьуртту хьуминнан, Чернобыллал авариялул иширттаву гьуртту хьуминнан ва мушакъатминнан.
Пресс-конференциялул лагрулий СВО-лул Аьрасатнал цалчинсса Виричу НурмахIаммад ХIажимахIаммадовлул ниттил Сапижат Мазаевал бувсунни ЗахIматрал ва соцразвитиялул министерствалул хасъсса аьралий операциялий ватандалул ххуллий чувшиврий жанну дуллуминнал кулпатирттах дуллалисса аякьалия.
Зулайхат Тахакьаева
