Ватан дуруччайманал кьинилул хьунийн Щардал школалий хьунни Ватандалул ххуллий жанну дуллуми дакIнин бичлачисса ва хасъсса аьралий операциялий талатиминнахь барчаллагь тIутIисса линейка.
Учительтал ва дуклаки оьрчIру бакъасса, мероприятиялий гьуртту хьунни билаятрал тарихрал хIурмат буручлачисса шяраваллил агьлугу.
Дуклаки оьрчIру бюхханну буслай бия ватандалул ххуллий чувшиврий жанну дуллуминная, ккалай бия шеърирду, тIий бия дяъвилул балайрду.
Хаснура хъуннасса къулагъас дурну дия хIакьину хасъсса аьралий операциялий ватандалул мурадру буручлачиминнах.
«ХIакьину жува хIурматрай дакIнин бичлай буру личIи-личIисса чIуннардий ватан дуручлай бивкIми, ватандалул цIаний чувшиврий жанну дуллуми, барчаллагь тIий буру хIакьину ватан дуруччаврил ххуллий бавцIуминнахь. Жува пахрулий буру жула вирттаврая. Жунма тачIав хъамабитан къабучIиссар хIакьину жува дакьаврий яшаврил цIаний жанну дуллуми», – увкунни школалул директор Мариян Ибрагьимовал.
