Ватан дуруччайманал кьини Гъумук Аьрасатнал Виричу НурмахIаммад ХIажимахIаммадовлул цIанийсса спортрал школалий хьунни Ватандалул ххуллий чувшиврий жанну дуллуминнал аьпалун хас дурсса, аьдатравун дагьсса Теннисрал турнир. Ватан дуручлай жанну дуллуми дакIнин бичин бувкIун бия теннисрал тIуркIу ххирами.

Райондалул жагьилтурал иширттал, спортрал ва туризмалул отделданул каялувчи Малик ХIусмановлул кIицI лавгунни укунсса мероприятиярттал кабакьу буллай бушиву жагьилсса никираву спортрахсса гъира бутан ва цIуллусса оьрму машгьур бан.
Бяст-ччаллий гьуртту хъанахъиминнан тIайлабацIу чIа увкунни райондалул администрациялул бакIчинал хъиривчу Явсупи ХIамзаевлул ва хасъсса аьралий операциялул гьурттучи Хайруттин Гъазиевлул.
Вайннал кIицI лавгунни спортрал турнирду Лакрал райондалий кьинилия кьинилийн аьдатравун дагьлай душиву.
Ххув хьуминнан ва кIанттурду бувгьуминнан дуллунни райондалул администрациялул чулухасса грамотартту ва бахшишру.
Зулайхат Тахакьаева