Щардал школалий тIиртIунни школалул выпускник МахIаммад Жамалуттиновлун ва Аьрасатнал Виричу Фархад Худайнатовлун цIа кусса «Вирттаврал партарду».

Ва хъуннасса агьамшиву дусса иш ккалли хъанай бур Ватан дуручлачиминнал виричушивурттая, ватандалул ххуллий жанну дуллуминная бусласисса патриот даврил ца биялсса бутIун.
МахIаммадлул ва Фархадлул оьрмулия, аьралий къуллугърая ва виричушивурттая бусласисса «партардал» дуклаки оьрчIан дакIнин бутлантIиссар цала ватанлувтурал чумартшиврия ва къучагъшиврия.
Мероприятиялий гьуртту хьунни шяраваллил администрациялул зузалт, бусравсса хъамал, учительтал ва дуклаки оьрчIру.
Ихтилатру буллалими кIицI лаглай бия жагьилсса никираву билаятрал тарихрал ва виричушиврул чулухунмайсса хIурмат тарбия баврил ххуллий укунсса сиптардал агьамшиву цуксса хъуннасса дуссарив.
«Жу пахрулий буссару жула школа къуртал бувминнал дянив ватандалул ххуллий цала жан хIайп къакусса виричу тарбия ан бюхъаврия», – увкунни школалул директор Мариян Ибрагьимовал.
КIицI лавгунни «Вирттаврал партарду» тIитIаврийну дуклаки оьрчIаву ххи хъанай бушиву вайннал эбратрай тарбия хъанансса гьавас, гьарза-гьарта дуллай душиву, жула вирттаврая дакъасса, жула билаятрал бюхттулсса тарихраяссагу кIулшивуртту.