Республикалул Аь. Тахо-Годил цIанийсса Национал музейраву хьунни Дагъусттан Республикалул Культуралул ирс буруччаврил агентствалул каялувчи МахIач Мусаевлул пресс-конференция. Ванал кутIану бувсуна ларгсса шин Агентствалун цукунсса хьуссарив. Хъирив журналистътурал буллусса чIявусса суаллахьхьун дуллуна жавабру.
Ларгсса шинал дурмуния тIий, МахIач Мусаевлул бувсуна Агентствалул хьхьичI бивхьусса мурадру, биттур буван аьркинсса масъалартту щаллу хьушиву.
Журналистътурал чIявуми суаллу бия жулла республикалул хъун-шагьрулул тарихийсса гьайбат дуруччаврийн, укуннагу чан хьусса хьхьичIарасса архитектуралул зданияртту ттизаманнулминнувух дярххун нанаврийн, цивппа заллухъру хьуминнал хьхьичIарасса къатран ччи-ччимур буллай бушиврийн багьайсса. Агентствалул каялувчинал хьхьичIарасса гьайбат лиян къадурну бакьин бувсса эбратрансса объектирдавух кIицI лавгуна Лакрал райондалийсса Хьурттал шяравусса мизит.
Бувсуна паччахIлугърал сияхIрайн ласунсса цIу-цIусса объектру ялун личин бавриха Агентствалул пишакарталгу зий бушиву, ва давриву цанма кумаг буллай укунмасса инсанталгу буккайшиву. Мисалдаран бувсуна ттигъанну паччахIлугърал бургаврилусса объектирдал сияхIрайн цалла шяраву ванияр 100 шинал хьхьичI, 1925-ку шинал, бувсса чарил ламугу ласира тIисса тавакъюращал ГьунчIукьатIрал жяматийсса советрал вакилтал бувкшиву ва ваницIунсса процедура дайдирхьушиву.
Суал бия Каспийскалийсса «Дагдизель» заводрал Культуралул къатрайн багьайссагу. Мусаевлул бувсуна ми къатри ядуваншиву, хIатта хъинну чIярусса арцу ми дакьин даврих гьан най дунугу. Бувсуна ва шинал Дагъусттаннал паччахIлугърал филармониялул къатри дакьин дуллантIишивугу.
«Илчи» кказитрал чулуха буллуссия суал Лакрал ва Лаващиял районнал дазуй революционер, шаэр, драматург Гьарун Сяидовлун дацIан дурсса гьайкалдануйн, ва дакьин даврийн багьайсса. МахIач Аьбдуллаевичлул цалва пишакартурайн тапшур бунни ва кIанттул хъирив лаян.
Ахирданий «Дагнаследиялул» каялувчинал цинявннайх бавчIуна «Памятники истории и культуры Дагестана: сборник статей» луттирду.
Агентствалул дуллалисса давурттаясса гьарта-гьарзасса материал дикIантIиссар кказитрал хъиривмур номерданий – МахIачкъалалив Национал библиотекалий хьусса Агентствалул коллегиялиясса.
Бадрижамал Аьлиева
