Ларгсса нюжмардий М. Горькийл цIанийсса Оьруснал театрданул чIивимур залдануву хьунни Дагъусттан Республикалул Культуралул министерствалул коллегия. Шиккусса ихтилатру бия ларгсса шинал дурми давурттаясса ва ва шинал дуванмуниясса.

Коллегиялий гьуртту хьунни Дагъусттан Республикалул культуралул министр Зарема Буттаева, Дагъусттан Республикалул ХIукуматрал председательнал цалчинма хъиривчув Муслим Телякавов, Дагъусттан Республикалул Халкьуннал Мажлисрал Культуралул комитетрал председатель Мурат Пайзуллаев, спортрал министр Сажид Сажидов, Дагъусттаннал Культуралул ирс буруччаврил агентствалул хъунама МахIач Мусаев, «Лезгинка» ансамбльданул директор Жамбулат МахIаммадов, Дагъусттаннал Театрдал ишккаккултрал союзрал председатель Айгум Айгумов.

Коллегиялул дайдихьулий культуралуву ва искусствалуву итталун дагьансса хьхьи­чIуннайшивуртту дурминнан дуллуна Республикалул ва Аьра­сатнал Культуралул министерстварттал чулухасса наградартту. Вай ларсминнавух бия жулва лакгу: «Республикалул Янин чани ба­къаминнансса хасъсса библиотека» ГБУ-лул хъунама ХIажи Маллучиев, А. Къапиевлул цIанийсса Лакрал театрданул артистка Зинаида Чавтараева, Дагъусттаннал лайкь хьусса артист Рашид Багатаев ва цаймигу.
Гихунай Муслим Телякавовлул, республикалий ларгсса шинал личIи-личIисса проектру щаллу даврия буслай, ацIаву дуруна «Пушкинская карта» тIимур программалий. КIицI лавгуна ва щаллу даврих личIиссара къулагъас дуллан, жагьилтурахь ва дуклаки оьрчIахь ванил лагрулий укра щаллу дуллан бюхъаймуния чIявуну буслан аьркиншиву, ванил давривух шайссаксса чIявусса культуралул идарартту хIала буххан буллан аьркиншиву.

Хъирив доклад бувсса Зарема Буттаевал бувсуна ларгсса шинал «Культура» национал проектрал ва чIярусса цаймигу региондалул ва билаятрал проектирдал лагрулий дурмуния, юбилейрдая, республикалул культуралул идарарттал дунияллул даражалийсса шадлугъирттавухсса гьурттушиннарая ва ларсъсса бахшиширттая. Министрнал бувсуна ларгсса шинал СВО-лул гьурттучитуран кумагран республикалул культуралул зузалтрал дурсса давурттаягу, аьрххирдаягу.

Ва шинал дуван нанисса хъунисса давурттавух кIицI ларгуна Дагъусттаннал паччахIлугърал филармониялул къатри дакьин даву, Азирбижаннал театрданулми къатри цIу дуккан дурну щаллу даву ва цаймигу. Дуван нани­сса юбилейрдавух ва шадлугъирттавух кIицI ларгуна Дагъус­ттаннал А. Тахо-Годил цIанийсса Национал музейрал 100 шин, Да­гъусттаннай пишакарсса искусствалул гьану бивзсса Готфрид ХIасановлул (композитор), Муэтдин Джемаллул ва Аскар Сарыджал (художниктал) 125 шинну, Къумукьнал театрданул 95 ва Лакрал, Яруссаннал, Лазгиял театрдал 90 шинну ва цаймигу. Бувсуна Ватан дуруччайманал шинал ва Бюхттулсса Ххувшаврил 80 шин шаврин хасну дуван дакIнийми давурттая, Ххувшаврил кьинилул гьантрай ремонтрая махъ тIитIинтIишиву В.В. Макаровал цIанийсса Боевой славалул музей.

Гихунмай республикалул цаппарасса районнал вакилтурал бувна докладру, вайннавух Лакрал райондалул Культуралул, спортрал, туризмалул ва ЦБС-лул директор Ансар Къажлаевлулгу. Ванал бувсуна хIакьинусса кьини райондалий ялапар хъанай 15 азарунния ливчусса инсантал бушиву, культуралул ва бигьалагаврил 27 центр бушиву аьмну 4 азаллий 680 инсаннансса кIану бусса, вайннува 12 бушиву капитальный ремонт дуван аьркинсса, 4 тIурча аварий тагьарданийсса. Бувсунни вай махъсса шиннардий министерствалул кумаграйну ремонтру дурсса, материально-техническая база цIу буккан бувсса идарарттая, райондалийсса творчествалул коллективирттая. Райондалул культуралул зузалт гьуртту хьусса ва хъанахъисса проектирдая, шадлугъирттая.

Бадрижамал Аьлиева