Зияуттиннул арс Аьлиев МахIаммадкьади

Февральданул 17-нний, хъунма хIал къашавайгу къавхьуну, ахиратрал хьунни Цалчинмур ЦIувкIуллал ва Къизлардал агьалинал дянив бусравсса адамина, Зияуттиннул арс Аьлиев МахIаммадкьади.
Увну ур ва 1939-ку шинал апрельданий.
Буттал шяраву арулшинал школагу къуртал бувну, ЧIяв ацIва классгу бувккуну, армиялийн лавгун ур. Дуккаврил итххявхсса МахIаммадкьади армиялия най унува увххун ур Ташкантлив Авиациялул институтравун. Мугу къуртал бувну, тиккува Ташкантуллал Авиациялул заводрай инженерну зий ивкIун ур. 1970-ку шинал ва Къизлярдайсса Самолетирттал детальлу дайсса заводрайн тIалав увну ур инженер-технологну. Ва заводрай зий ивкIун ур цехрал хъунаману, личIи-личIисса отделлал каялувчину.
Бюхъу-бажар бусса пишакар хIисаврайгу, ххуйсса каялувчи хIисаврайгу ва лайкь хьуну ур хIукуматрал наградарттан, ларсун дур «ХьхьичIунма рационализатор», «Авиациялул промышленностьрал бусравсса зузала» тIисса цIарду. Коллективрал дянивгу ва хъунмасса кьадрулий ва кьиматрай ивкIун ур.
МахIаммадкьади гьуртту шай­ссия ЦIувкIуллал дуллалисса давурттавугу, цала агьлу-авладран, дустуран, гьалмахтуран цIакьсса чIарахацIунугу уссия. ЦIувкIрав шяраваллил кьини дуллали­сса чIумал, КамАЗ бувгьуну, шяраваллил агьулданун аьркинмур ларсун увкIссия цала чулуха ссайгъатран.
МахIаммадкьади инсантуращал хIал бавкьусса, хIалимсса, ххишала акъа дакIгу, хасиятгу ххуйсса, гьарца даймуниву итххявхсса, жаваблувшиву ххишаласса инсан уссия. Кулпатращал ванал, лайкьсса тарбиягу дуллуну, чивун буккан бувссар арс ва кIива душ.
Хъуннасса кьурчIишивугу кIидачIлай, жижара буллай буру ванал кулпат ПатIиматлухь, арс Русланнухь, арснал щар Жариятлухь, душру Аминатлухь ва Мадинахь, куяв КьурбанмахIаммадлухь, ссу Раяхь ва махъсса цинявппагу гъан-маччанахь.
МахIаммадкьадинал рухI рахIатний дишиннав, махънал оьрмурдай барачат бишиннав, алжаннул ххари аннав.
1-мур ЦIувкIуллал ва
Къизлардайсса лакрал жямат

Пашмансса хавар бавунни ттун – ттулва ххирасса цалчинмур учительница
Башарат МахIаммадовна
дунияллия лавгсса. Хъуннасса кьурчIишивугу кIидачIлай, Цалчинмур ЦIувкIратусса-Чапаеволиясса Халиловхъал кулпатрал цIанияту, жижара буллай ура Мирзоевхъал кулпатрахь.
Имандалийсса бивкIу хьуннав, Башарат МахIаммадовнал рухI хъинний дишиннав, ванил барачат махъ ливчIун лякъиннав.
АьбдурахIман Халилов