ЧIяйннал Магьирлугърал къатрал хъунмур СалихIат Алхасовал каялувшиндарай хьунни Интернационал бурж лахълай бивкIсса аьралийтурал кьинилун хас дурсса мероприятие.

Шикку гьуртту хьунни Ккуллал райондалул «ЧаннацIуку» кказитрал корреспондент Арсен Аьбдуллаев, Чехословакиянал дяъвилул иширттал гьурттучи МахIаммад Эльдаров ва ЧIяйннал школалул дуклаки оьрчIру. Арсен Аьбдуллаевлул бувсунни Авгъан дяъвилул тарихрая.
– Совет аьрал Авгъаннава бу­ккан бувну гьашину 36 шин там хъанай дур. Авгъаннал аьрщарай интернационал бурж бартбигьлай бивкIсса аьралийтуран захIматсса кьинирду лахъан багьссар. Та дяъвилия зана къавхьуссар 14 азарунниха ливчусса жула офицертал ва аьралийтал, 6 азарахъул ливтIуссар щавурду дирну ва къашай хьуну, 311 аьраличу    ятIа-тIар бакъа ливчIссар.
Авгъаннал дяъвилий гьуртту хьуну ур  2958 дагъусттанлув. Да­гъусттаннал  жагьилтал къучагъну талай бивкIссар Авгъаннал дяъвилийгу, цIанагу хасъсса аьралий операциялий лайкьну бартбигьлай буссар аьралий бигарду, – увкунни Арсен Аьбдуллаевлул.
– Авгъан дяъвилул иширттаву гьуртту хьун кьисмат хьуссар ЧIяйннал шяравасса жагьилтурангу. ЧIявусса лайкь хьуссар личIи-личIисса наградарттан. Та дяъвилия чивчуну бур чIявусса луттирду, ларсун дур кино. Чил билаятрай аьралий бурж биттур буллай бивкIсса оьрчIру мудангу дакIний бикIантIиссар. Минная буслан аьркинссар ялун нанисса никирахьгу, – увкунни МахIаммад Эльдаровлул.
Дуклаки оьрчIал бувккунни Авгъан дяъвилул гьурттучитуран хас бувсса шеърирду.
Имара Саидова