Февральданул 15-нний Ккуллал райондалул Культуралул центрданий хьунни «Эхо Афганистана» тIисса, Интернационал бурж лахълай бивкIсса аьралийтурал кьинилун хас дурсса мероприятие. Шикку гьуртту хьунни райондалийсса Авгъан дяъвилул ветерантал, райондалул администрациялул террорданийн къарщисса комиссиялул вакилтал, дуклаки оьрчIру ва идарарттал зузалт.
Мероприятие дачин дурну ия Марсел Сулайманов. Мажлис тIивтIунни райондалул администрациялул бакIчинал хъиривчу Анатолий Давдиевлул.
– Авгъаннал аьрщарай интернационал бурж лахълай бивкIссар 600-ннийн бивсса совет аьралийтал. Авгъаннаву жанну дуллусса дагъусттанлувтураву 4 лаккучу ур. Тай дяъвилул иширттаву ккаккан дурсса къучагъшивурттахлу 769 дагъусттанчу лайкь хьуну ур личIи-личIисса аьралий наградарттан. ХIакьину жура кIицI лаглагисса кьинилул хъуннасса агьамшиву дуссар. Абадлий дакIний бикIантIиссар Авгъан дяъвилий жанну дуллуми, – увкунни ванал.
Авгъаннаву интернационал бурж лахълай бивкIсса Ккуллал шяравасса Аьликьади МахIаммадовлул ва Хъусращиял шяравасса МахIаммадхIажи Закарияевлул бувсунни жула жагьилтурал тай кьинирду къучагъну лархъшиву.
– ХIакьину жува хIурматрай кIицI лаглагиссару тай иширттаву хъуннасса чувшиву ва кьянкьашиву ккаккан дурсса аьралийтурал цIарду. ЦIанасса жагьилтураву Ватандалухсса ччаву тарбия дан аьркинссар укунсса инсантал эбратну ккаккан буллай, – увкунни вайннал.
Ветерантал барча буллалисса ва жанну дуллуми дакIнин бичлачисса ихтилат бунни Ветерантурал советрал председатель ТIагьир Абакаровлул.
Хасъсса аьралий операциялул гьурттучи, 2-мур ЦIувкIуллал шяравасса Нураттин Рамазановлул бувсунни Украиннал аьрщарай нанисса хасъсса аьралий операциялул иширттая, жула аьралийтурал ккаккан дуллалисса чувшивурттая.
Ваччиял ва ЧIяйннал школардал дуклаки оьрчIал Мустапа Маликовлул, Жамалуттин Мирзаевлул, Аьбдул ТIухIуевлул, СалихI Мудуновлул ва Арсен Чупановлул бувккунни аьралийтуран хас бувсса шеърирду, Культуралул управлениялул зузалтрал ккаккан дунни концерт.
