Вай гьантрай МахIачкъалалив Дусшиврул къатраву хьунни ДР-лул БакIчинал ва ХIукуматрал администрациялул каялувчи МахIач Оьмаровлул хасъсса аьралий операциялул гьурттучи Закария Аьлиевлущалсса хьунабакьаву.
Хасъсса аьралий операция нанисса кIанттурдай ватандалул мурудру буруччаврил ххуллий талан цала хушрай лавгсса сапер-разведчик машгьур хьуссар Запорожскаллал дяъвилий шанна нюжмардул мутталий я дукансса дукия, я хIачIансса щин дакъа, ккашин чимус канай, мякьлин водородрал перекись хIачIлай, ВСУ-рал аьралуннайн цана цувалу данди ацIан бюхъаврийну. Аьрасатнал талаталтраща ганачIан гъан хьунвагу бюхълай бивкIун бакъар, анжагъ ялтту лехлахисса дронну лихъан дарча дакъасса. Гайннал кумаграйхчил Закариянаща бювхъун бур минардал дургьусса къурух жуламинначIан уккан.
Дагъусттаннал бакIчи Сергей Меликовлул цала блограй Дагъусттаннал къучагъ лащан увну ур Борис Васильевлул «В списках не значился» тIисса романдалувасса Николай Плужниковлуха.
Сергей Меликовлул Указрайн бувну, Закария Аьлиевлун дуллунни «Ккаккан дурсса чувшиврухлу» тIисса медаль.
МахIач Оьмаровлул кIицI лавгунни Закария Аьлиевлул чувшиврия пахрулий бушиву так ца Дагъусттаннал агьлу бакъасса, щала Аьрасатгу.
«Ина дурсса виричушиву тарихраву личIаву дакъасса, хъирив нанисса никирангу эбратну хъанахъиссар», – увкунни МахIач Оьмаровлул.
«Доблесть гор» тIисса хасъсса аьралий операциялий талатиминнан кIулшивуртту ва гьунар аьч баврил ххуллий щурущи бувсса проектраягу бувсун, маслихIат бунни Закария Аьлиевлун ва программалуву гьурттушинна дан. МукIруну ура, увкунни, программалул лагрулий ларсъсса кIулшивуртту лябукку буну ишла дан бюхъантIишиврийн республика хьхьичIуннай даврил ххуллий.
Дагъусттан Республикалул Мюхчаншиву дуруччаврил советрал секретарь, Аьрасатнал Виричу МахIаммад Бааьчиловлул кIицI лавгунни Закария Аьлиевлул щалла дунияллун ккаккан дуршиву Аьрасатнал саллатIнал хIакьсса лажин.
«Шанна нюжмардул мутталий цана цувалу душманнал бита-ххитаврилу ливчIсса аьраличунал ккаккан дурну дур нажагьсса чувшивугу, дакIнил кьуватгу.
Жула Верховный главнокомандующий Владимир Путиннул аьралийтурал хьхьичI бивхьусса мурад биттур буллай, зу марцI дуккан дуллалиссару Аьрасатнал аьрщи душманнацIа. Заннал зу буручлачиссару, европанал агьалинан мурдал дан ччисса дин зу дуручлай бушиврухлу», – увкунни ванал.?
ДР-лул ХIукуматрал хъунаманал хъиривчу Рамазан ЖахIпаровлул барчаллагь увкунни Закария Аьлиевлул ниттихь лайкьсса арс тарбия аврихлу. КIицI лавгунни ванал гьунар мяйжаннугу виричушиврун ккалли бан лайкьсса бушиву.
«Ина, бакIрачIан дуркIсса захIматшивурттугу дурхIуну, жапасса тагьарданувагу увккун, вила гужругу цачIун бувну, бан аьркинсса чIумал биттур бувунни вийва бивхьусса бурж», – ххи бунни ЖахIпаровлул.
Зулайхат Тахакьаева
