Февральданул 15-нний МахIачкъалалив, генерал Оьмар Муртузалиевлул цIанийсса Аьралийтурал-интернационалистътурал паркраву, хьунни совет аьрал Авгъаннал аьрщарая буккан бувну 36 шин шаврин хас бувсса аьпалул акция.
Шикку гьуртту хьунни Дагъусттаннал ХIукуматрал председательнал хъиривчутал АьбдурахIман МахIмудов ва Муслим Телякавов, МахIачкъалаллал администрациялул бакIчинал хъиривчу ХIаким Ашиков, «Дагестанский союз ветеранов Афганистана» тIисса жяматийсса организациялул председатель полковник Нажмуттин Акаев, Дагъусттаннал Ветерантурал союзрал председатель МахIарам Аьлиджанов, авгъан дяъвилул ветерантал, чил билаятирттай интернационал бурж бартбигьлай жанну дуллуминнал гъан-маччами, Росгвардиялул зузалт, юнармейцы.
Мероприятие тIитIлай, ихтилат бунни АьбдурахIман МахIмудовлул.
– Чил билаятрай, захIматсса дяъвилул шартIирдай совет саллатIтурал ва хIаписартурал ккаккан дурссар цала чувшивуртту ва лайкьну бартбивгьуссар аьралийтурал, интернационалистътурал бурж.
ХIакьину жува дакIнин бичлачиссару дазул кьатIув билаятрал мурадру буручлай жанну дуллусса жула ватанлувтал.
Авгъаннал аьрщарая совет аьрал бувккун 36 шин ларгунни. Тийх интернационал бурж бартбигьлай бивкIсса аьралийтал эбратну хъанахъиссар цIанасса ва ялун нанисса никирттан.
ЦIанасса чIумалгу жула билаятран захIматсса кьинирду лахълан багьунни. Жула ватанлувтуран Украиннал аьрщарайсса данди бацIавриву цIунилгу ккаккан дуллан багьунни цала чувшиву ва яхI. ХIакьину Аьрасатнал билаятрайн данди дарцIуну дур 50-ннийн дирсса баргълагавал хIукуматру. МукIрура ва кьинигу жура лайкьну лахъантIишиврий, – увкунни ванал.
Интернационал бурж бартбигьлай жанну дуллусса аьралийтурал аьпалун баян бунни минутIрайсса пахъ багьаву.
Авгъан дяъвилул ветеран Нажмуттин Акаевлул оьвчаву дунни авгъан дяъвилул гьурттучитурайн, гьарица шинах тийх жанну дуллусса 141 аьралий дуснал суратирттащал БивкIу бакъасса полкрал акциялуву гьуртту хьун, мукунма Ххувшаврил кьини Лениннул комсомолданул цIанийсса паркравусса Аьралийчунал гьайкалдануцI тIутIив дишин гьан.
Авгъан дяъвилул ветерантал лахъа-хъун буллалисса ва жанну дуллуми дакIнин бичлачисса ихтилат бунни МахIарам Аьлиджановлул. Ванал кIицI лавгунни Авгъан дяъвилул ветерантал хIакьину хъанахъимунияту арх бувцун бакъашиву. Вайннал ччя-ччяни гьан байшиву хасъсса аьралий операциялий Ватандалул мурадру буручлачиминнансса гуманитар кумаг, чялишсса гьурттушинна дайшиву жяматийсса иширттаву, хъунмасса захIмат бихьлай бушиву жагьилсса ник тарбия даврил ххуллий.
Ихтилатру къуртал хьуну махъ Аьралийтурансса гьайкалдануцI дирхьунни тIутIив.
Акциялул лагрулий тIитIин бувну бия Ххувшаврил Ттугъ.
Акциялул гьурттучитуран тIивтIуну бия полевая кухня.
Сайки 10 шинал лажиндарай Авгъаннал аьрщарай най бивкIсса (1979-1989 ш.ш.) дяъви тарихраву ца яла лахъи лавгмур дяъвилун ккаллиссар.
Авгъан дяъвилий гьуртту хьуссар 3,5 азарунния ливчусса дагъусттанлувтал. Миннава 141 инсаннал интернационал бурж бартбигьлай жанну дуллуссар. 600-нния ливчусса дагъусттанлувтал лайкь хьуссар личIи-личIисса орденнан ва медальлан. Совет Союзрал Виричунал цIа дуллуссар Аьппас Исрапиловлун, Аьрасатнал Виричунал цIа – Нухидин ХIажиевлун.
Совет аьрал буккан бувссар Авгъаннава 3 ятапIрай.
1989-ку шинал февраль зурул 15-нний Совет аьралуннащалсса махъра-махъсса бронетранспортерданул Дусшиврул ламуйх Амударья нех лархъссар. Ва хъуннасса колонналуву махъва-махъ Авгъаннал билаятрая увкссар 40-мур армиялул командующий, Совет Союзрал Виричу, генерал-лейтенант Борис Громов.
Ва кьини кIицI лаглан бивкIссар Аьралийтурал интернационалистътурал кьинину. Февраль зурул 15-нний щалагу жула билаятрай шайссар Дунияллул КIилчинмур дяъви къуртал хьуния шихунмай дазул кьатIувсса дяъвилул иширттаву гьуртту хьусса 1,5 миллиондалия ливчусса ватанлувтал дакIнин бичлачисса акциярду.
Андриана Аьбдуллаева
