Дагъусттаннал бакIчи Сергей Меликовлул дунни Республикалул «Победа» оргкомитетрал заседание. Субъектрал каялувчинал тапшурлугърайн бувну, оргкомитетравун бувххун бур жяматийсса идарартту, ихIсандарал фондру, журналистътал ва чичулт.
Заседаниялийн бавтIминнал ххал диргьунни Буттал КIанттул цIанийсса Хъун дяъвилий ххув хьуну 80 шин шаврин хасъсса шадлугърал мероприятияртту даврил план, республикалий «Знамя Победы» акция баврил, ми мероприятиярттал хIакъиравусса информация дузал баврил, Хъун дяъвилул гьурттучитуран ва къинттуллух зий бивкIминнан кумагрансса чараннал хIакъиравусса, Ххувшаврин 80 шин шаврин хасъсса Дунияллул халкьуннал дянивсса волонтертурал корпусрал давурттал сакиншиндарал хIакъиравусса ва цаймигу масъалартту.
Республикалул каялувчинал дакIнин бувтунни, 2025-ку шин билаятрал президентнал баян бувну бушиву Ватан дуруччайманал шинну. Мунийн бувну, къулагъас дуван аьркинну бур тарихраву хьуну бивкIсса иширттах.
«Цинявннан кIулну бикIан аьркинссар гьашину оргкомитетрал бартдигьлантIишиву мероприятияртту, юбилейрал лагрулийсса дакъасса, Ватан дуруччайманал шинал лагрулийссагу. Жува аьркинссар план щаллу дуллан дяъвилул тарихрацIун бавхIусса циняв виричушиврул иширттайну. Мунил личIинура агьамшиву дуссар жула оьрчIан ва жагьилтуран, ялун нанисса ник тарбия давриву ва ми билаятрал ярагъбу гужирдаву къуллугъ буллан хIадур бавриву. Масалдаран, жула жагьилтуран кIулну бикIан аьркинссар 2-мур февральданул ци тарих буссарив, Сталинградуллал талатаву къуртал хьусса кьини. Дяъвилул тарихраву дакъассар та кунна лахъи ларгсса цамургу талатаву. Ягу ласунну цамур мисал: Ккавкказуллахлусса цIа ларгсса хъуннасса талатаву къадиркIссания, Дагъусттаннал тарих цамур куццуйсса бикIан бюхъайва», – увкунни региондалул бакIчинал.
Ванал пикрилий, Ххувшаврил парад хъун дуван аьркинни дучрал расчетрайну, дяъвилул ва патриотшиврул журалийсса сакиншиннардийну, щала республикалий парадрал расчетру дурну. Ватан дуруччайманал шинал личIиссара къулагъас дикIан аьркинну дур 23-мур февральданул байрандалухгу. Байрандалул хьхьичIсса щалла нюжмар дикIан аьркинну дур мероприятиярттал авадансса.Ми гьантрай дикIан аьркинну дур Краснознаменная Каспийская флотилиялул мероприятияртту, школардаву – аьралийталгу гьурттусса, чувшиврул иширттая бусласисса дарсру, яла ххуйми концертру.
Сергей Меликовлул тапшур бунни Ххувшаврил шинан хасну МахIачкъалаливсса Лениннул комсомолданул цIанийсса паркраву дузал буван 80 мурхь бувгьусса аллея. Мурхьру бугьан тIий бур апрельданул ахирданий Валентина Макаровал цIанийсса цIу буккан бувсса «Музей Боевой славы» тIитIлатIисса кьини.
ЦIусса аллеялул цачIун бантIий бур личIи-личIисса шиннардий жула Ватан дуручлай бивкIсса Дагъусттаннал вирттал – Хъун дяъвилул ветерантал, авгъаннал аьралийтал, 1999-ку шинал дяъвилул иширттал гьурттучитал, хIакьину СВО-лул зоналий Аьрасатнал мурадру буручлачими. Гьарца мурхьирал чIарав бикIан тIий бур аьраличунаясса информация. Мунийну хъанахъиссар ядуван личIи-личIисса никирттал дянивсса дахIаву ва Ватан дуручлачиминнал аьпа.
Республикалий Ххувшаврин хасъсса шадлугъру цукун дантIиссарив бувсунни республикалул вице-премьер Муслим Телякавовлул.
Юбилейрайн хIадур шаврил хIакъиравусса давуртту ккаккан дурну дур. Гьануми мероприятиярттал пландалувун бухлай бур 100-хъул патриотшиврул акциярду, дуккаврил программартту, ветерантуращалсса ва СВО-лул гьурттучитуращалсса хьунабакьавуртту ва цаймигу мероприятияртту.
Сергей Меликовлул тапшур бунни Ххувшаврин 80 шинан хасъсса план щаллу дуван цаймигу мероприятияртту ялун ххи дурну.
Гьануми мероприятиярттуну хьун аьркинссар ветерантуран ва СВО-лул гьурттучитуран кумаг баву, жагьилтал патриотшиврий тарбия баву.
«Ми масъаларттаву формализм дикIан къааьркинссар. Умуд бур, муниципалитетирттал бакIчитуран на тIутIимур баяншиврийн», – увкунни Сергей Меликовлул.
ДР-лул ва ХIукуматрал Администрациялул жяматийсса проектирдал отделданул хъунама Шамил Аьлиевлул бувсунни Дагъусттаннай «Знамя Победы» акция чув ва ци журалий бантIиссарив. Гьашину му акция буван хIадур хъанай бур Дарбантлив «Патриот» паркраву. Мичча байбишин тIий бур автопробег, къуртал хьунтIий бур Волгоградрай Мамаев кургандалий «Родина – мать зовет!» монументрацI.
Заседаниялий мукунма ххал бивгьунни юбилейрая бусаврил ва чичаврил масъалагу. Республикалул бакIчинал пикрилий, му хъанахъиссар давурттал ца агьаммур бутIану.
Ххувшаврин 80 шин шаврил мероприятиярттая гьартану буслантIиссар ва чичлантIиссар циняв СМИ-рдал.
Муния бувсунни ДР-лул БакIчинал ва ХIукуматрал Администрациялул каялувчинал хъиривчу – ДР-лул БакIчинал Информациялул политикалул ва прессалул къуллугърал управлениялул хъунама Рашид Акавовлул.
Ванал тIимунийну, цIанасса ппурттуву хIадур дуллай бур мероприятиярттая буслансса ва чичлансса медиапланну.
Буттал КIанттул цIанийсса Хъунмасса дяъвилул гьурттучитуран ва къинттуллух зий бивкIминнан кумаг баврил хIакъираву бувсунни региондалул захIматрал ва социал лябуккулул министр МахIаммадзагьид Кихасуровлул.
ДР-лул жагьилтурал иширттал министр Камил Саэдовлул бувсунни Ххувшаврин 80 шин шаврин хасну волонтертурал суккушиндаралми давурттал хIакъираву.
Ххувшаврил 80 шинан хасъсса Дунияллул халкьуннал дянивсса ДР-лул волонтертурал корпус тIивтIуссар ларгмур шинал декабрьданул 9-нний, Ватандалул Вирттаврал кьини. Га бувну бивкIссар Республикалул жагьилтурал центрданул гьанулий. Мунил хъунмур задачану хъанахъиссар Ххувшаврил 80 шин шаврин хасну республикалий дуллалисса мероприятияртту сакин даву ва волонтертурал чулухасса кумаг баву.
Ххувшаврин 80 шин шаврин хасъсса социал рекламалул хIакъираву бувсунни ДР-лул Информациялул ва печатьрал агентствалул каялувчи Аьбдуразакь Жамалуттиновлул. Ххувшаврил 80 шинан хасну республикалий щурущи дантIий бур цIусса социал проект.
Дузал дуван най бур шагьрурдал ва районнал кIичIирттан цIарду дирзсса вирттаврал савлугъран цаппара билбордру ва ми лахъан тIий бур транспортрал хъуними магистраллай ва хъуни къатрай.
Заседаниялий гьурттучитурал бувсунни юбилейрал план гьарта дувансса цаппара предложениярттал хIакъираву. Миннувасса цаппараннуцIун авкьунни региондалул бакIчи.
Оргкомитетрай бувсъсса предложенияртту ва замечанияртту хIисаврайн ласун ккаккан бувну бур. Зузи группалул заседанияртту дуллан тIий бур гьарца зуруй.
ХIадур бувссар
ХI. Аьдиловлул
