ЦIуссалакрал райондалийсса ДучIиннал шяраваллил Культуралул къатрал художествалул каялувчи Барият Оьмариева бивунни хасъсса аьралий операциялий гьуртту хъанахъисса Малик Оьмаровлул кулпатрачIан.
Малик ур мукьа оьрчIал ппу.
– На ттула оьрчIру Ватан ххирану тарбия бан хIарачат буллай ура. Ялун нанисса ник жула эбратрайри тарбия дан аьркинсса. Украиннал неонацистътурайн данди бавцIуну, билаятрал мурадру буручлай ккаккан дуллай бур жула аьралийтал цала Ватандалухсса ччаву, – увкуна Маликлул хасъсса аьралий операциялийн наниний.
Барият Оьмариевал бувсунни аьраличунал кулпатрахь паччахIлугърал СВО-лул гьурттучитурал кулпатирттан дуллалисса хIаллихшиннардая, цIухху-бусу бунни кулпатрал ичIаллил масъаларттая.
Ватан дуруччул кьинилун хасну
ЦIуссалакрал райондалул Культуралул управлениялучIасса библиотекалуву хьунни Ватан дуруччайманал кьинилун хас дурсса мероприятие. Цала каялувчи Нажмият Аьлиеващал мероприятиялий гьуртту хьунни ЦIуссалакрал 1-мур школалул мюрщи классирттал дуклаки оьрчIру.
ОьрчIал библиотекалул методист Айзанат Къуркъиевал бувсунни байрандалул тарихрая. ОьрчIал дурккунни назмурду, дирхьунни суратру, бунни тIуркIурду.
Мероприятиялул мурад бия оьрчIру Ватан ххирану тарбия шаву.
Авгъан дяъвилул ветерантуращалсса хьунабакьаву
ЦIуссалакрал райондалий ЦIуссачIурттащиял шяраву хьунни чил билаятирттай Интернационал бурж бартбигьлай бивкIсса аьралийтурал кьинилун хас дурсса мероприятие.
Шиккун оьвкуну бия Авгъан дяъвилул ветерантурайн. Вайннал дакIнин дирчунни цивппа Авгъаннал билаятрай къуллугъ буллай бивкIсса чIунну ва совет аьралийтуран лахъан багьсса захIматсса кьинирду. Бувсунни совет саллатIнал ва хIаписартурал тай иширттаву ккаккан дурсса чувшивурттая.
Хъамаллуран ккаккан дунни байрандалун хас дурсса концерт. Мероприятиялул лагрулий мукунна ккаккан дунни та дяъвилул лахIзарду чIалачIи буллалисса видеороликру. Дуклаки оьрчIал дурккунни назмурду.
Зана къавхьуминнал аьпалун баян бунни минутIрайсса пахъ багьаву.
Пишалул бигарду лайкьну бартбигьлай
ЦIуссалакрал райондалийсса ЦIуссалакрал шяраву ялапар хъанахъисса Гьамиящатусса ХIусайн ва Аминат Аьбдуллаевхъал арс Исмяил Аьбдуллаев цалчинсса гьантрая шихунай хасъсса аьралий операциялий ур. Тихун ва лавгун ур хушрай, аьралий хIакиннал пиша ласайхту.
2021-ку шинал Исмяиллул къуртал бувну бур Санкт-Петербургуллал С. Кировлул цIанийсса Аьралуннал ва медициналул академиялул ракетный, сухопутный ва воздушно-десантный аьралуннансса хIакинтал хIадур байсса факультет. Ца шинава байбивхьуну бур хасъсса аьралий операция, Исмяиллунгу дяъвилул шартIирдай байбишин багьну бур захIматрал ххуллу. Ванан багьну бур зун, хирургну акъассагу, кардиологнугу, терапевтнугу, психологнугу. Итххявхсса, бюхъу-хъит бусса жагьил айивхьуну ур цала граждан ва патриот бурж лахълай. Ванал му даву лайкьну бартдигьлай ушиврул барашинна дуллай дур чIярусса аьралий наградарттал: «За помощь в бою», «Участник боевых действий», «За боевое отличие», «За отвагу» медальлал.
Исмяил кунмасса сивсусса, кьянкьасса къучагътурал кIунттихьри жула бучIантIимур бусса. Ванал ккаккан буллай ур Ватандалул бивхьусса буржгу, пишалул бигардугу биттур бан аьркинсса куц. ДакI дарцIуну буру Исмяиллул пишалул ххуллийсса ккаккиярттая жунма уттиния тихунмайгу цимилагу баянтIишиврий.
Андриана Аьбдуллаева
Наградалун лайкь хьунни
Хасъсса аьралий операциялий Ватандалул мурадру буручлачисса Гьамиящиял шяравасса Шяъван Кьурбанов лайкь хьуну ур «За отвагу» медальданун. Украиннал аьрщарай Аьрасатнал билаятрал хасъсса аьралий операция байбишайхту, Шяъваннун пикри хьуну бур микку гьуртту хьун. ХIакьинусса кьинигу ва хьхьичI ххуттай авцIуну, аьраличунал бурж лайкьну бартбигьлай ур.
Шяъван барчаллагь тIий ур ЦIуссалакрал райондалул бакIчи МаматIи ХIамзатовлухь ва Гьамиящиял шяраваллил бакIчи ХIабибуллагь Рашидовлухь аьралийтуран буллалисса кумаграхлу.
– Ттун кIулли жула райондалул бакIчинал мудан кумаг буллай ушиву хасъсса аьралий операциялул гьурттучитуран ва миннал кулпатирттан, мудан къулагъасрайн лавсун ушиву миннал ичIаллил масъалартту. Архну бунугу, жун асар хъанай дур райондалул бакIчинал аякьа. Цинявппагу аьралийтурал чулуха барчаллагь учин ччай ура, – тIий ур Шяъван.
Аьралийтал дакI дарцIуну бур хасъсса аьралий операция жула ххувшаврийну къуртал хьунтIишиврий.
Андриана Аьбдуллаева
