Росгвардиялул управлениялул «Ястреб-Каспий» СОБР-ал зузала, полициялул лейтенант, къуллугърал бурж бартбигьлай хасъсса аьралий операциялий жан дуллусса Сабир Исмяиловлул цIа дуллунни Буйнакск шагьрулийсса ца кIичIираваллин.
ХIаписарнал аьпалул ула тIитIлатIисса мероприятиялий гьуртту хьунни кIанттул органдалул хъунаманал хъиривчу полициялул полковник Зураб Баккунов, шагьрулул администрациялул вакилтал, архIал къуллугъ буллай бивкIми, гъан-маччами.
Зураб Баккуновлул барчаллагь увкунни къучагъсса арс тарбия увсса нитти-буттахь. Буйнакск шагьрулул администрациялул аппаратрал каялувчи Аьбдул Багьауттиновлул кIицI лавгунни Сабир дакIний икIантIишиву къучагъсса талатала ва хIакьсса патриот хIисаврай. Сабир Исмяилов дуклай ивкIсса КIулшивуртту дулаврил шагьрулул центрданул дуклаки оьрчIал дурккунни ванан хас дурсса назмурду, увкунни балайрду.
КIичIиравусса къатрал чIирай цIакь дурсса аьпалул ула тIитIин вихшала дунни аьраличунал нину Зубайжат Аьлиевайн ва Зураб Баккуновлуйн.
Зувайжатлул барчаллагь увкунни арснал аьпа абад баву мурадрай дурсса даврихлу.
