Вай гьантрай Совет Союзрал кIийла Виричу АхIмад-Хан Султаннул цIанийсса МахIачкъалаллал аэропортрал конференц-залдануву хьунни ДР-лул Транспортрал ва ххуллурдал хозяйствалул министерствалул даврил хIасиллу дуллалисса пресс-конференция. Шикку гьуртту хьунни журналистътал, блогертал, ведомствардал зузалт ва жяматийсса ишккаккулт.
Пресс-конференция аэропортрай бувссагу шиная шинайн гьарза хъанахъисса пассажиртал, тIитIлайннасса цIу-цIусса авиарейсру ва авиапредприятиялул давриву дурсса хьхьичIуннайшивуртту хIисаврайн ларсунни.
Транспортрал ва ххуллурдал хозяйствалул министр Жамбулат Салавовлул балжину бувсунни ведомствалул даврия, чIалачIи дурсса ккаккиярттая, проектирдая ва гьашинусса шинал хьхьичIун лавсъсса масъаларттая.
«Безопасные качественные дороги» тIисса национал проектрал лагрулий бакьин бувну бур 46,7 километралийхсса ххуллурду. Дакьин дурну дур 146,6 километралийхсса 342 объектрайсса ххуллурдал ва кIичIирттал сетьру. Аьмну республикалий, бакьин бувну, низамрайн бувцуну бур 445 километралул манзилданийхсса ххуллурду ва 18 ламу.
Туристътурансса маршрутру хьхьичIуннай даву мурадрайсса программалул лагрулий 11 объектрай бакьин бувну бур 35,6 километралийхсса ххуллурду, буллай бур «Кавказ» тIисса федерал трассалувун багьайсса ххуллурду. МахIачкъалаллал хьхьирил машлул портрайхчIин жучIанна дукIлай дур 14 журалул кьай. ДукIусса шинал 580 тонна къалмул диян дурну дур Ираннавун.
Хъуннасса къулагъас дур зунттавусса щархъай ххуллурду баврих ва бакьин баврих. Зунттал районнай бувсса ххуллурдая буслай, министрнал кIицI лавгунни 55 объектрай 200 км. лахъишиврийсса ххуллу бувшиву.
2024-ку шинал национал проектрал лагрулий республикалийн бувкIун бур 17 хъунисса ва 28 дянивсса классрал атобусру. ЦIуну бувкIсса автобусру, январдания байбивхьуну, занай буссар МахIачкъала шагьрулул агьамми кIичIирттавух. Мукунма республикалийн бувкIун бур 6 вагондалущалсса ттизаманнул 4 электричка. Электропоездру занай бур «МахIачкъала — Хасаюрт» ва «МахIачкъала — Дарбант» маршрутирттай. Уттигу бучIан тIий бур 2 электричка.
Шиккува бувсунни гьашинусса шинал дантIисса давурттаягу.Пландалийн лавсун бур 483 километралийхсса ххуллурду ва бакьин бантIий бур 13 ламу. Хьхьирил портрай буван ккаккан бувну бур шинай 1,5 млн тонна къалмул ядуван бюхъайсса терминал.
МахIачкъалаллал аэропортрайгу дайдишин тIий бур А-терминалданул строительство.
Жамбулат Салавовлул кIицI лавгунни, МахIачкъалаллал аэропортрай зунтIишиву 45 метра утташиврул ва 3200 метра лахъишиврул дусса, цIуну бувсса, самолетру щядикIайсса ва леххайсса полоса. Шикку кьамул дуллан бюхъантIиссар ччимур журалул самолетру.
Шагьрулия шагьрулийн ттигу 2 электричка занази бантIий бур.
Республикалул хъун шагьрулийн 10-15 автобус бучIан бантIий бур.
Министрнал кIицI лавгунни, гьашину МахIачкъалаллал ххуллурдай сайки 60 автобус ххишала хьушиву.
Ахирданий Жамбулат Салавовлул Барчаллагьрал чагъарду буллунни ведомствалул даврия чялишну буслай ва чичлай бивкIсса журналистътуран. Барчаллагьрал чагъар буллунни жула лаккудуш, аэропортрал пресс-секретарь Сапура МахIаммадовангу.
Шиккува бусан, Жамбулат Салавовлул бувсунни, цува мудангу хIадурну ушиву хIасул хьусса масъаларттащал бувкIсса агьали кьамул буллан ва ми щаллу буллан.
Имара Саидова
