Каспийск шагьрулул Аьрасатнал Халкьуннал аслийсса культуралул центрданий ттигъанну хьунни Абусупиян Чимаевлул «Перспектива» цIанилусса выставка тIитIлатIисса батIаву. Ва жагьилсса художникнал цаллалусса цалчинсса выставка хъана­хъиссар. Ванил сиптачинугу бур лавай кIицI лавгсса идара. Ши­ккува дакIнин бутан, пишакарсса гид-экскурсовод, художник Абусупиян Чимаев ГьунчIукьатIрал шяравассар.

Выставка тIитIлатIисса шадлугърай гьуртту хьунни Каспийск шагьрулул администрациялул вакилтал, Абусупияннул гъан-маччами, даврил уртакьтал, дустал.
– Художествалул кIулшивуртту къаларснугу, художник чIиви­нияцIава творчествалуха зий ур. Цимилгу гьуртту хьуну ур личIи-личIисса выставкардай, – увкуна, выставка тIитIлай, ЦТКНР-лул директорнал хъиривмур Ольга Казаковал.
Хъирив ихтилат бувсса Каспийск шагьрулул Культуралул управлениялул начальник Мурад МахIаммадовлул барчаллагь увкуна Абусупияннухь творчествалухсса ччаврихлу, буллалисса захIматрахлу, кIицI лавгуна цув мудангу ххари шайшиву, Абусупиян кунмасса, культуралухун багьсса, цалла творчество хьхьичIуннай дуллали­сса, мина-гьану Каспийскалиясса инсантал хьунабакьайхту, гьамин, ва кунмасса творчествалул вибувцIусса ва перспективный­сса инсантурайн бувну Каспийск ккалли байшиву республикалул культуралул столицалун.
Гихунмайсса ихтилатирттая махъ цинявнналагу ххал дурна жагьилсса художникнал кIунттила дурксса давуртту. Вайрив выставкалий дия 25, вайннува 3 дия акварельданий дирхьусса, 23 – маслолий. БакIрайра Абусупияннул суратру кьаландалух дишай­сса диркIун дур. Махъ дихьлан ивкIун ур акварельданий, хъиривгу – маслолий. Вай кьяйдарду, художниктурал учайсса куццуй, «захIматсса техникарттан» ккаллиссар, хаснуварив маслолий сурат дишаву. Абусупияннул вай махъсса 10 шинал дянивсса давурттугу дур укунсса журалий щаллу дурсса.
ХьхьичIа Абусупиян гьуртту шайсса ивкIун ур школалий, университетраву дуллалисса шагьрулул ва республикалул лагрулийсса выставкардай. Махъсса шиннардий цимилгу гьур­тту хьуну ур Республикалул Халкьуннал творчествалул къатлул дуллалисса, цайнува цивппа хьусса художниктурал «Родники Дагестана» тIисса республикалул выставкардай.
Художествалул школалийн къазанарчангу, 5-мур классрава тинай занай ивкIур ур сурат дишаврил кружокрайн цува дуклакисса Кадетътурал хьхьирил школа-интернатрай (ш. Каспийск). Гьамин шиккур бивзсса ванал цалла дакIнил ларсъсса даврил гьанугу. Абусупиян хъунмасса барчаллагьрай ур цала цалчинсса педагог Сумцова Ольга Ивановнайн.
Университетраву (Донской государственный технический университет) дуклакисса чIумалгу диркIун дур сурат дишаврил ва живописьрал дарсру.
Цалла цалчинсса цаллалу­сса выставкалун «Перспектива» тIисса цIа хар-хавар бакъа дирзун дакъар ванал.
– Ва выставка, цурда чIи­ринугу, цирив-ца хъуннасса затрал дайдихьулун ккалли дан бучIи ххай ура, – тIий ур Абусупиян.
Ванан ххирар тIабиаьтрал суратру дихьлан.
– Махъ ппурттуву ттун ляли­чIинура ххира хьунни ттуруллив, щин, щинал дагьанттувусса суратру дихьлан, тIаби­аьтрал личIи-личIисса элементру цачIу ккаккан буллан. Дуссар чIумущал даххана шаймур, дуссар абадлийссагу, инсаннайн хъар дакъа, цийнура цирда щаллу хъанахъиссагу, инсан ляхъаннингу диркIсса, дусса ва мудангу дикIантIисса. ТIабиаьт ттул дакIнил гьавасри, асардал бакIщаращир, – тIий ур Абусупиян.
Ростов-на-Дону шагьрулий университетраву архитекторнал пиша лавхьхьусса, 4 шинай му пишалий зий ивкIсса Абусупияннун архитектуралулми пейзажругу ххирар.
Чил билаятирттал мазру лахьхьавривугу итххявхсса Абусупиян махъсса шиннардий зий ур Дагъусттан Республикалул Туристический центрданий гидну-таржумачину. Ларгсса шинал ва ххув хьуссия щалагу Аьрасатнал «Лига экскурсоводов» тIисса конкурсрай.
Жагьилсса художникнал цалчинсса выставка тIиртIуну дикIантIиссар февральданул 28-ннийнин.

Бадрижамал Аьлиева