ЦIуссалакрал райондалий лахъа-хъунну хьунаавкьунни Аьрасатнал Виричу Эседулла Абачев. Дуклаки оьрчIащал хьунабакьин ванащал архIал бувкIун бия хасъсса аьралий операциялул гьурттучи, Дагестанские Огни шагьрулул бакIчи Замир ХIажимурадов, Дагъусттаннал Халкьуннал Мажлисрал председательнал хъиривчу Камил Давдиев, Дагъусттаннал Халкьуннал Мажлисрал депутат Артур Исрапилов, ЦIуссалакрал райондалул бакIчи МаматIи ХIамзатов, ванал хъиривчу Амир Султанов. ЦIуссалакрал гимназиялий вайннал тIутIив дирхьунни Аьрасатнал Виричу Мутай Исяевлул гьайкалдануцI.
Хъирив хъамал бувцунни хасъсса аьралий операциялийнсса хъамул чирахъру баврил мастер-класс ккаккан. Эседулла Абачевлул кIицI лавгунни, ва хьхьичI ххуттай бавцIусса, захIматсса шартIирдайсса саллатIнан ххуйсса кумаг бушиву, чирахъирттал аьралийтурал дакIругу, чурхругу гъили бантIишиву.
Гихунмайсса ихтилатру хьунни гимназиялул актовый залдануву. Тарихрал учитель ва краевед Сулайман ХIамидовлул бувсунни Мутай Исяевлул оьрмулия ва чувшиврия. Хъамаллурал ххал бунни, ппал дюххай къатIуя, оьрчIал кIанттуйн дияннинсса, нукIузаманнул кьайлул чIюлу бувсса этникалул мурцIу. Ниттил мазрал учительницал бувсунни гьарица шикку ккаккиялун дирхьумуния. Гьурттучитуран ккаккан дунни генерал-майор Эседулла Абачевлуясса документал фильм. Ва ур Хивский райондалийсса Зильдик шяравасса. Школа къуртал бувну махъ ва увххун ур Аьралий училищалувун хIаписар хьунсса пикрилий. 1989-ку шинал къуртал бувну бур Харьковское высшее танковое командное училище. Лейтенантнал цIагу ларсун, аьралуннаву къуллугъ буллан лавгун ур.
