Ва ларгсса ххуллункьини ГьунчIукьатIрал шяраву «Ушедшим и живым» тIисса МемориалданучIан бавтIун бия шяраваллил агьлу, дуклаки оьрчIру ва хъамал. Ва кьини шикку тIитIлай бия СВО-лий жан дуллусса Къардашов Руслан Багъдадинал арснал аьпалул ула.
БатIаву дачин дурну ия ГьунчIукьатIрал дянивмур даражалул школалул директор Малик Къушиев. Ванал ва батIаврийсса цалчинсса махъгу буллуна ула тIитIаврил сиптачину хьусса, ваницIун дархIусса харжлувгу цалла бакIрайн ларсъсса Зиябуттин ХIажимирзаевлухьхьун. Ванал цалва ихтилатраву кIицI лавгуна ва Аьпалул чIирай ултти тIитIлансса аьратталсса ишру, сававртту чан хъананнав ва духлаганнав тIисса, ва чIирал лагру вания тиннай хъунна къахъананнав тIисса махъру.
Гихунмай ихтилатру бувминнавух бия Руслан Къардашовлул учительница Саида Касаева (МухIадова). Ванил чан дакъая Русланнул ГьунчIукьатIрал школалий дуклакисса чIумуцIун дархIусса дакIнин бичавуртту, амма, кьакьарттуй дарцIусса къурхъ ва иттав дукIлакIисса макь сававну, цинявннуя бусан хъанай бакъая. Русланнул школалий дуклакисса шиннардицIунсса дакIнин бичавуртту дия Малик Къушиевлулгу.
Русланнул оьрмулиясса гьарта-гьарзасса ихтилат бувна гъанчув Аьбдул Аьбдуллаевлул.
Улттуя пардав лирккуна Русланнул ниттил Зильфридал ва ванил ссил арснал Исламлул.
Дуклаки оьрчIал дурккуна патриот зумунусса назмурду.
Багъдадинал арс Руслан Къардашов увну ур 1987-ку шинал Таджикисттаннай Курган-Тюбе шагьрулий ГьунчIукьатIрал шяравасса Багъдадинал ва Зильфридал кулпатраву. Школалийнгу тихва лавгун, яла вайннал кулпат шихунмай бивзун, оьрчI 3-мур классравун лавгун ур буттал шяравусса школалийн. Дянивмур даражалул дуккавурив щаллу дурну дур Ростовуллал областьрай. 2006-ку шинал, Новочеркасск шагьрулия увцуну, лавгун ур аьралуннаву къуллугъ буван. Ватандалул хьхьичIсса цалва буржгу лавхъун, зун ивкIун ур Сочи шагьрулий. Контрактгу чирчуну, Сириянавун лавгун, та билаятрай аьралий къуллугърай шанна шин дурну дур. Сириянал хъирив – Ливия. Тти, махъ, 2022-ку шинал июльданий лавгун, Украинагу.
Русланнул виричувшиврий жан дуллуну дур январьданул 10-нний 2023-ку шинал Артемовск (Бахмут) шагьрулий.
Русланнул къучагъшивурттансса кьиматну хьуну дур диялсса наградартту: «За заслуги перед Отечеством» 2-мур даражалул орден, «Не побежден, не сломлен» ва «За участие в КТО в Центральной Африканской Республике (ЦАР)» медальлу, «За военные заслуги» ЦIуку, «За военную доблесть» ххач (ЦАР), «За отвагу и мужество» арцул ххач, Ливиянал ВС-лул «Орден Храбрости», «За освобождение Шугалея и Суэйфана» медаль, «За победу над ИГИЛ» медаль ва чIярусса цаймигу. Руслан Къардашов ЛухIи ххачлил мукьийла кавалер хьуну ур. Аьпалул хьуну махъ дуллуну дур Чувшиврул орденгу.
Русланнул уссу Гьарунгу цIана Украиннаву талай ур. Вагу, махъсса цинявппагу жагьилталгу ччясса чIумуй ва цIуллуну-сагъну зана хьуннав гъан-маччаминначIан, ххувшавугу ларсун.
Руслан кунмасса къучагътурал дурмунил кьиматгу лавайссар, вайннал аьпагу уттавассар.
Бадрижамал Аьлиева
