Лакрал райондалул бакIчи Юсуп МахIаммадов хьунаавкьунни «Движение Первых» организациялул кIанттул отделениялул каялувчи Руслан Кулиевлущал.
Шикку ххал бивгьунни жагьилтурал политика хьхьичIуннай даврийн багьайсса агьамсса масъалартту, гьунар бусса жагьилтуран кабакьу буллансса сиптарду зузи даврил, волонтертурал ккуран хьхьичIуннай даврил ва ялун нанисса ник ватан ххирану тарбия даврил ххуллий дансса давуртту.
Руслан Кулиевлул бувсунни жагьилтурал хъинчулий ккарксса цаппарасса проектирдая.
Юсуп МахIаммадовлул кIицI лавгунни проектру зузи даврил ххуллийсса масъаларттаха райондалул администрациялущал цачIуну зун тIий бушиву.
Умуд бивхьунни райондалул администрациялущал цачIуну «Движение Первых» ккурандалуща бюхъан тIий бушиврий хIасул дан жагьилтураву цашиву цIакь дансса, бюхъурду итххяххан бансса шартIру.
Барчаллагь увкунни Руслан Кулиевлухь чялишсса граждан позициялухлу.
Зулайхат Тахакьаева
