«Ватан» ва «Ххувшаву» тIисса мукъурттил мяъна дух­лагантIиссар, агана дунияллий Ватан ххирасса, ванил цIаний жанну дулун хIадурсса чиваркI бакъахьурчан. Ватандалийн кьини дурксса чIумал хъиннува бувчIлай бур, жула жагьилтал кунма къучагъсса ва чумартсса цайми бакъашиву.
Украиннал аьрщарай нанисса хасъсса аьралий операциялий хушрай гьуртту хьун лавгминнавасса ца ур ЧIаящиял шяравасса ХIусайннул ва ГьунчIукьатIрал шяравасса Аьишатлул арс Муслим Магьдиев.

Муслим увну ва хъуна хьуну ур ТIюхчарав. Шяраву школагу къуртал бувну, 2 шинай аьралуннаву къуллугъ буллай ивкIун ур. Аьралуннава зана хьуну махъ, зун увххун ур виваллил иширттал органнавун. Зий ивкIун ур Чачаннал ва Аьра­сатнал МВД-ттал органнаву. Шикку зий Муслим лайкь хьуну ур майорнал чиндалун. Хасъсса операциялий гьуртту хьуннинсса аьра­лий иширттаву ккаккан дурсса чувшивурттахлу ванан дуллуну дур «За воссоединение Харьковской области с Россией», «За мужество и отвагу», «За службу в спецназе ДНР» тIисса медальлу, «Георгиевский крест» тIисса хIурматрал лишан ва цаймигу наградартту.

Майор Магьдиев хасъсса аьралий операция байбивхьуния шийнай талай ур яла къизгъинсса талатавуртту нанисса кIанттурдай. Шикку ччаннайн кIусса щаву дирну, 3 зуруй Красногорскаллал госпитальданий хъин хъанай ивкIун ур. Цува хъин шайхту, цала гьалмахтурачIан СВО-лийн зана хьуну ур. Шин ва дачIи дурну дур Муслимлул ччаннай бивхьусса Илизаровлул аппаратращал аьралий буржру бартбигьлай. Аппарат бувкьун махъгу, цала цIуллу-сагъшиврулсса буллай къаавцIуну, аьсаврттай унува, аьралий гьалмахтурая личIи къавхьуну ур. Ватандалул мурадру буручлай ккаккан дур­сса чувшиврухлу лайкь хьуну ур Къучагъшиврул ордендалун.
Муслим ур гьалмахтурал дянив хIурмат-кьимат бусса, увкумур байсса, къахьунссар, къаданна къачайсса инсан. Ванан хIат-хIисав дакъа ххирар цала язи бувгьусса пиша. Муслим чIивинийва аьралийчу хьунсса хияллай ивкIун ур.

Ванал бу­ттал ппу Султангу Хъун дяъвилул ветеран ивкIун ур. Ппу ХIусайн 1999-ку шинал дяъвилул иширттал ополченец ур. Хъунама уссу МахIаммад ЦIуссалакрал райондалул виваллил иширттал органнаву зий ивкIун ур. Вагу 1999-ку шинал дяъвилул иширттал ветеран ур. Муслимлул чIивима уссу Насруллагьгу хушрай аьралий операциялий гьуртту хьун лавгун ур. Вагу, аьралий бурж лавайсса даражалий бартбигьаврихлу, лайкь хьуну ур личIи-личIисса наградарттан.
Муслимлул, ванал уссурваврал ва Дагъусттаннал чIявусса цаймигу жагьилтурал, хасъсса аьралий операциялул иширттаву къучагъну талай, ккаккан буллай бур цивппа Ватандалийн дакI тIайласса аьралийтал бушиву.

Имара Саидова