Дагъусттаннал бакIчи Сергей Меликовлул барча дунни лачIун буккаврил Дагъусттаннал цачIундур команда. ЦIунилгу Дагъусттаннал лачIун буккаврил цачIундур команда яла гужмур хьунни Красноярскалий хьусса Дунияллул халкьуннал дянивсса «Иван Ярыгиннул Кубок» турнирданий. Жула спортсментурал дурххунни 6 мусил, 4 арцул ва 7 чарвитул медальлу.
Турнирданий ххув хьуминнахь ихтияр дуссар гьашину ччалли буккан Европанал чемпионатрай. ДакI дарцIуну ура тиччагу жула жагьилтал медальлащал зана хьунтIишиврий. Барча тIий ура жула чемпионтурал ва призертурал хьхьичIунсса хIасиллу. Вайннал гьарцаннал ккаккан бунни цала чурххал хIал, усттаршиву ва ххувшаврийнсса бияла. Дагъусттаннал спортсментурал цал уттигу ккаккан бунни цивппа яла бюхттулний бушиву ва цачIанма чIявусса цаймигу кIункIу тIий бушиву.
Ттун ляличIину тIааьнну бур жула атлетътурал Совет Союзрал бюхттулсса даражалийсса лачIунукку Иван Ярыгиннул цIанийсса бяст-ччаллаву цивппа яргну чIалачIи баву.
Жула жагьилтуран чIа тIий ура цIусса рекордру, ххаллилсса ххувшавуртту ва цIакьсса цIуллушиву. Шиная шинайн жула дакIру пахрулул ва ххаришиврул дуцIлай дур зул ххувшавурттайну!» — тIий бур Сергей Меликовлул Телеграм-каналданийсса барча баврий.

Турнирданий ххув хьунни Заур Угуев (67 кило), Ибрагьим Ибрагьимов (65 кило), АхIмад Усманов ( 79 кило), МахIаммад Кьурбанов (97 кило), Екатерина Вербина (65 кило), Ксения Буракова (72 кило).
Арцул медальлу дурххунни Муслим Мехтихановлул (61 кило), Рамазан Ферзалиевлул (65 кило), МахIама ДибирхIажиевлул (74 кило), МухIаммадтIагьир Ханиевлул (92 кило).
Чарвитул медальлу ларсунни Юнус Явбатировлул (57 кило), Анзор Мажидовлул (61 кило), Кьурбан Шираевлул (70 кило), Жамал АхIмадудиновлул (79 кило), Ада Багьамадовлул (86 кило), МахIаммадшариф Биякаевлул (92 кило), Елизавета Смирновал (50 кило).
Лажин хIадур дурссар
ХIасан Аьдиловлул