Ислам МахIачев январьданул 27-нний зана хьунни Ватандалийн. УчIайхтува, UFC-рал чемпионнал лагма лавгунни журналистътал. Исламлул миннал суаллахьхьун дуллунни жавабру.
Муттаэ аххана аврил хIакъираву
– БакIрайва ттул муттаэ аххана увансса пикри бакъассия. Чурххал кIушиву чан дуллалисса кьини кIюрххила, 2 кило чан дуван лирчIсса чIумал, ттучIан оьвкунни ттула дус Зубайра Тухуговлул ва цIувххунни: «Вил муттаэ аххана хьушиву тIайлассарив?» – куну. На бувсъссия, аххана къавхьушиву: «Ттун муния цичIав къакIулли», – увкуссия. На мунил пикри буллай акъассияв, лавгра ттула чурххал кIушиву яларай дутан, ва яла чурххал кIушиву дуцин. Яла ссят 9 ва 30 минутIраву ттучIан къатлувун увххунни менеджер, мунал бувсунни ихтилат буван аьркинну бушиву. Му чIумал ттун бувчIунни цирив ца дахханашиву хьуну душиву, бюхъайва муттаэ аххана увну икIангу. Менеджернал ттухь бувсунни ттун иян багьлай бушиву Мойканощал, агарда жу рязи хьурча. Гьалбаттаки, на ххаригума хьуссияв муттаэ лякъаврия.
Арман Царукяннущал ва Джастин Гейджищал иян бюхъайшиврул хIакъираву
– Арманнущал на иян бюхъайссар, му бияву ванил хъирив хьунтIий дакъар, цанчирча Дана Уайтлул (UFC-рал президент) бусаврийну, га цала базилуцIа хьуну ур (потерял свой шанс). Жуща бюхълай бур биян Гейджищал, агарда ганал хъиривмур бияврий цала бюхъу ккаккан барча. На Оливейращал ва Царукяннущал ивссара, Джастиннущал иян увассара, мунияту ганащал ияву ттул мурад бия.
ЦIусса чурххал кIушиврийн учIаврил хIакъираву
– ЦIанасса ппурттуву ттул куклумур чурххал кIушиврий ттущал биянсса чIалай бакъар. Иширайну на сайки цинявннащал ивра, ягу циняв куннащал кув бивну бур. Ттул пикри бур 77 килорал кIушиврийн учIан ва муний аглан хьун.
Дянивмур даражалул кIушиврий титульный биявриву ххув хьуманащал ияврил хIакъираву
– Хъунисса хаварду буслан ччай акъарача, буруганну ссайну къуртал шайрив ва дивизиондалул чемпион Белал МухIаммадлул ва Шавкат РахIмоновлул бияву. Яла ихтилат буван аьркинни UFC-рал каялувчинащал ялун дучIансса чIумул бан-битанмуния, махъра- махъсса бияву хьуну махъ на танащал гъалгъа къабувссар.
Царукяннул
ва Усман НурмахIаммадовлул дянивсса бияврил фаворитнал хIакъираву
– Агарда Усман жущал гьуртту хьуну ивкIссания тренировкардал лагерьданий, ганалгу, ттулгу дянив тапават къадикIантIиссия, Царукяннущалсса биявриву жу лякъинтIиссия ххув хьунсса ххуллу.
Цири Умар НурмахIаммадовлун аьркинсса Мераб
Двалишвилияр ххув хьуншиврул?
– ЧIярусса дахханашивуртту аьркинну дакъар, Умардун аьркинссар гьуртту хьун щаллусса тренировкардал лагерьданий. Масалдаран, на Американавун лавгссияв иян 40 кьини лирчIсса чIумал. Муниннин 2 зуруй на хIадур хъанай уссияв ичIува. На уссияв Кисловрай, зунттаву сбордай, хIадур хьуссара шавагу. Яни ттул дуссия 3 хIадуршиндарал ятIап, ялара на лавгсса Американавун. Та чIумал Умар жущал акъая, га иян найгу акъая. Жу Американавун бивсса чIумал, Умардун иян ккаккан бувну бия. Так та чIумал га увкIуна, цувагу цIунцIия хьусса канищал, залданувух занай ия лангетращал. Цува чемпионшиврул цIанийсса ияврил базилуцIа къахьуншиврул, га гьуртту хьуссар иявриву. Ттул пикрилий, ганал ккаккан дуруна лайкьсса, архIалсса даражалийсса ияву, ганан биял къавхьуна чемпионшиврул цIанийсса ияврил опыт. Тамансса дахханашивуртту дуван къааьркинссар, аьркинссар так уттигу дулун иянсса ца бази.
Усман НурмахIаммадовлул мурцIув секундантнал даврил хIакъираву
Бюхъай ттуща бусан къахьун, му цуксса захIматсса зат буссарив, чемпионнал цIанихлусса биявугу духьувкун. Хъинну захIматссар дустурал биявурттай тамаша буллан, миннал бияврил хажалат ккухIлан. Усман ххув хьуну махъ номерданувун увкIссияв, хIатта нава цукун шанавух лавгссариввагу дакIний бакъар.
Медийностьрал ва рейтингирттал хIакъираву
– Миннул сияхIру на къадара, миннул хъиривгу къаизара, мунил аьркиншивугу дакъар. Щин-дунугу ми ххуй дизлайгу духьунссар. Медийностьрал 2 чул бур, кувний ччан бикIай укуна кьатIув увккун сайр буван, щинчIав кIулгу къавхьуну. Медийностьрал чулуха 1-мур ххуттай ушиву ттул мурад бакъар.
МахIаммад
Анкалаев
ва чемпион Алекс Перейра бияврил хIакъираву
– Ттун чIалай ур Анкалаев ва бияврил фаворитну, амма га яла агьамма акъар.
Перейра хъинсса ию ур, мунал дур хъуннасса любительшиврул карьера, чIявусса ккавксса спортсмен ур, захIматсса биявурттавух гьуртту хьуну ур, мунал хъунмасса опыт бур. Анкалаевлун аьркинни хъинну хIадур хьун, ххув хьуншиврул.
