Январданул 23-нний ДР-лул ХIукуматрал председатель Аьбдулмуслим Аьбдулмуслимовлул бувсса хIукмулийн бувну, ДР-лул транспортрал ва ххуллурдал хозяйствалул министрнал хъиривчуну ивтунни лаккучу, ЧIяйннал шяравасса Загьидинал арс Саэд Рамазанов.
Ва къуллугърай итаннин Саэд уссия Совет Союзрал кIийла Виричу АхIмад-Хан Султаннул цIанийсса МахIачкъалаллал аэропортрал хъунаману. Шикку зузисса хIаллайгу, зун гъирагу, даврил опытгу бусса, цува зузисса даврийгу, агьалинангу бусравсса, жагьилсса пишакарнал чIярусса давуртту дурссар.
Саэд Рамазановлул бюхъу-гьунардания кIулми вихшала дирхьуну бур чIумуцIун бавхIуну къуццу тIисса, даврил масъалартту чулийн буккан байсса пишакар ушиврий.
Шиккува кIицI лаган, ва цувагу лакку мазгу, миллатгу ххирасса патриот ур.
ЧIа тIий буру Саэдлун цIакьсса цIуллушиву, оьрмулуву тIайлабацIу. Занналгу кабакьиннав вицIун, вил гьунаргу, кьудратгу диял хьуннав къуллугърал бурж лажин кIялану биттур буллан.
Имара Саидова
