Январданул 29-нний МахIачкъалаллал музейраву тIиртIунни «Физкульт-привет, Махачкала!» тIисса цIанилусса выставка. Ванил сиптачитал бур шагьрулул администрация ва Культуралул управление.

Выставка хас дурну дур шагьрулул спортрал авадансса ирсиран, цувгу чIалачIи бувсса суратирттай (дирхьуссагу, ларсъссагу).
Экспозициялий дур 100-нния лирчусса экспонатру. Вайннуйн бувну тамашачитуран кIул хъанай бур чIярусса шиннардил мутталий шагьрулий спортрал оьрмулуву хъанай бивкIмур, спорт хьхьичIуннай хъанай диркIсса куц, совет шиннардий шагьрулийсса ва республикалийсса физкультуралул ва спортрал суккушиннарая, спортрал культуралия. Суратирттая буруглай бур цIа дурксса спортсментал. Ккаккиялун дирхьуну дур шагьрулул спортрацIун дархIусса цайми-цайми затругу, документругу.
Ва проект щаллу давриву, цалла фондирттавасса суратру ва цаймигу материаллу дуллуну, чIарав бавцIуну бур Дагъусттан Республикалул ЦГА, А. Тахо-Годил цIанийсса Национал музей, П.С. ХIамзатовал цIанийсса ДМИИ, Дагъусттаннал Спортрал музей.
Выставка дикIантIиссар апрельданул 15-ннийнин.
Бадрижамал Аьлиева