Январьданул 25-нний Аьрасатнаву кIицI лагайссар Студентнал кьини. Ва кьини лахъа-хъун байссар вузирдал студентътал ва преподавательтал. Дуккавриву хьхьичIунсса студентътуран вузирдал дайссар бахшишру.
Чансса бакъар Дагъусттаннал ва республикалул кьатIувсса вузирдаву лавайсса кьиматирттай дуклакисса хьхьичIунсса лакрал студентътал. Миннавасса ца бур Дагъусттаннал медициналул университетрал лечебный факультетрал 4-мур курсрай дуклакисса Кьурбанова ПатIимат Арсеннул душ. Ванил ххуйсса ккаккиярттай къуртал бувну бур МахIачкъалаллал 7-мур гимназия. Университетравугу ПатIимат марцIну ххювардай дуклай бур.
– Ттун оьрчIнияцIава ххуй бизайва хIакиннал пиша. Ци дуссар инсаннал цIуллу-сагъшиврул тагьар къулай дан кумаг бувну, ганал дакI-чурх рахIат буккан бавунияр чирисса. Мукунсса кумаг бан бюхъаншиврул, хIакиннал куртIсса кIулшивуртту дикIан аьркинссар. Нагу хIарачат буллай бура ми ласун, – тIий бур ПатIимат.
ХIакиннал пишалухсса ччавугу, кIулшивуртту ласунсса гъирагу ПатIиматлун ирсирай бивсса бухьунссар.
Ва бур цала оьрмулул хъунмур бутIа Дагъусттаннал медициналул университетран хас бувсса академик, медициналул элмурдал доктор, профессор ХIусайнов ТIагьир Сайдуллаховичлул душнил душ, медициналул элмурдал доктор, профессор Сабина ХIусайновал душ.
ДакI дарцIуну бура, ПатIиматлуягу вайннал цIа лайкьну дуруччинсса, щалагу лакрал миллатрал цIа бюхттул дансса лавайсса даражалул хIакин, аьлимчу хьуншиврий.
ТIайлабацIу баннав, Заннал кабакьиннав.
