Аьрасатнал Президентнал Дагъусттаннал Постпредствалул хъунама Владислав Толстюк, аьдатрайн бувну, Москавуллал вузирдаву дуклакисса Дагъусттаннал студентътуращал хьунаавкьунни.

Ванал бувсунни хIакьинусса кьини Москавлив ва Москавуллал областьрай дуклай ушиву Дагъусттаннаясса 6500 студент, шиная шинайн ва ккал-аьдадгу хъун хъанай душиву. Бувсунни Постпредствалул студентътал кIункIу бувайшиву Москавлив дуллалисса Да­гъусттаннал культуралул ва гьар журалул мероприятиярттайн. Хьунабакьаврий гьуртту хьусса ПаччахIлугърал Думалул депутат Султан ХIамзаевлул бувсунни, 25 азарунниха ливчусса дагъусттанлувтал гьуртту хъанай бушиву СВО-лий, миннаву чIявусса лайкь хьуну бушиву паччахIлугърал ларай­сса наградарттан. КIицI лавгунни СВО-лул цалчинма Виричугу дагъусттанчу НурмахIаммад ХIажимахIаммадов ушиву. «Цуксса къумашиву дакIурдиву дунугу, цала дардирдавун къакьувтIуну, жулва жагьилтал тарбия бавриву бутIа бихьлахьисса гужгу, кьуватгу цавува лявкъусса вирттаврал ниттихъал хIурматгу бюхттулну бикIан аьркинссар», – увкунни ванал, мероприятиялий НурмахIаммадлул нину Сапижат Мазаева бушиву кIицI лаглай.
Сапижатлул бувсунни арснал-Виричунал оьрмулул ххуллия, НурмахIаммад гьармуниву итххявхсса, дакI-аьмал хъинсса оьрчI ивкIшиву, чув-адаминал журат дусса, хасиятру ххуйсса унутIий, ххуйсса арсгу, ласгу, ппугу ушивугу ккаккан бувшиву, аьралий гьалмахтурай, къуллугърал цаярва ялавайминнай дакIцIуцIаву дусса, аякьа дусса ивкIшиву. Ванил студентътуран маслихIат бунни Ватандалух ччаву дуну зун, яхъанан дарсирдах, элмулух къулагъас дуну, жяматийсса иширттавух чялишну гьуртту хъанансса хIарачат буллан.
Постпреднал цалчинма хъиривчу Табир Маликовлул бувсунни Дагъусттаннал «Каспий» тIисса батальондалул аьралий ххуллия, кIицI лавгунни ва батальон чIяву миллатру бусса, хIакьсса кулпат хьушиву аьралийтуран, батальондалувуцири, куннал кув бувгьуну къуццу тIий, чувшиврий талай бушиву. Ванал, цалва ихтилат къуртал буллай, «Каспийлул» аьралий ттугъ Сапижат Мазаеван бахшишран буллунни.
«Да­гъусттаннал студентътуращалсса дахIаву жу тачIавгу хIура дуккан къаритару, декабрьданийгу дуссия хьхьичIунми студентътуран Дагъусттаннал бакIчинал стипендия буллалисса шадлугъ.ХIакьинусса давугу миннаву патриотизм цIакь шаврил ххуллийссар», – увкунни Постпреднал маслихIатчи Зоя Хановал.
ПатIимат Рамазанова