Чапаево шяравасса Сулайманнул арс Халил Халилов Дагъусттаннал медициналул университетрал студент ур.
Ванал мусил медальданий къуртал бувну бур Чапаевкаллал 2-мур школа. Байбихьулул классирттава айивхьуну, ххуйну дуклакаврицIун, школалийсса циняв мероприятиярттавугу чялишну гьуртту шайсса ивкIун ур.
КIулшивуртту ласун гъира бусса Халиллул циняв экзаменну ххювардай дуллуну дур. Химиялул экзаменнай лавсун бур 93 балл.
Химиялул дарсирдал чулухунмайсса бюхъу оьрчIан цала ттатта Тажуттин Сайпуллаевлуйхчин буллусса бухьунссар. Ва куртIсса кIулшивуртту дусса химиялул учитель ивкIун ур. Ччяни дунияллия лавгун ур.
Цала кIулшивурттайну Халил увххун ур Дагъусттаннал медициналул университетрал стоматологиялул факультетрайн. Шиккугу жагьил лавайсса кьиматирттай ккалай ур. Ва ур захIматрая нигьа къаусайсса, гьарица ишираву жаваблувсса студент.
ТIайлабацIу баннав.
ЯтIул дипломрай институтгу къуртал бувну, лавайсса даражалул пишакар хьуну ккакканнав.
