Бюхттулсса Ххувшаву ларсун 80 шинан хасну жула билаятрай баян бувсса Ватан дуруччул шинал лагрулий, Ватан дуруччул кьинилун хасну, СВО байбивхьуну 3 шин там шаврил хьунийн «Илчи» кказитрал баян буллалиссар Чувшиврул ордендалул кавалер, СВО-лий ватандалул ххуллий чувшиврий жан дуллусса Алик Гъазиевлул аьпалун цIа кусса оьрчIал лакку мазрай дюхханну СВО-лул темалул назмурду дуккаврил конкурс.
Конкурсрал учредитель хъанай бур «Илчи» кказитрал отделданул редактор, Алик Гъазиевлул ниттирссу Зулайхат Тахакьаева.
Ххув хьуминнан дипломру ва бахшишру дулунтIиссар Зулайхатлул харжлугърах.
Цалчинмур кIану булунтIиссар ца инсаннан (10 азарда къуруш), кIилчинмур – кIиннан (ххю-ххюазарда къуруш), шамилчинмур – шамуннан (шан-шаназарда къуруш).
ДикIантIиссар тамашачитурал язи увгьума хIисаврайсса личIисса премия – телеграм каналданий яла чIявусса чIу бавтIнан 5000 къуруш.
ОьрчIру назмурду ккалаккисса видеорду гьан дувара, бюхъавай, телеграм-каналданийхчин: @Ilchi_info_bot (https://t.me/ilchi_info_bot). Агарда телеграм- канал дакъахьурча, бучIиссар ватсапрайн ва номерданий гьан дувангу: 8 988-466-28-41
Чара бакъа ккаккан дурну дикIан аьркинссар назму ккалаккисса оьрчIал цIа, фамилия, буттал шяравалу, цими шин дуссаривгу. Шагьрурдайминнал — цивппа дуклакисса школардал номердугу.
Ххув хьусса оьрчIру конкурсрайн хIадур бувсса учительтуран (ниттил хIадур увхьурча, ниттин) булунтIиссар Барчаллагьрал чагъарду хIисаврайсса дипломругу.
ТIалавшинна: видеорду ккалаккиманал чIу баянну, бувчIинну, аьлагъужа къабагьанну, ххуйну чIаланну дикIан аьркинссар!
Назмулул цIагу, авторнал цIагу чара бакъа чичин аьркинссар!
Видеорду кьамул дуллалиссару февраль зурул ахирданийннин.
Ялугьлагьиссару!
