Махъсса ппурттуву ялу-ялун чIяву хъанай бур хасъсса аьралий операциялуву гьуртту хъанахъиминнал чIарав бацIан ччисса инсантал. МахIачкъала шагьрулул администрациялул чулухасса ирглийсса гуманитар кумаг гьан бунни Курскаллал областьрай аьралий буржру бартбигьлагьисса «Каспий» тIисса Дагъусттаннал цалчинсса добровольчествалул батальондалул аьралитуран. Гуманитар кумаг биян бувну увкIунни Аьбдулкарим Айгунов.
Ва ххуллухь мукьилчинни ванал аьралийтуран кумаг буллалисса. Утти ванал биян бунни майлул чирахъру, генераторду, тепловой пушкарду, дуки-хIачIия, медикаментру, захIматсса шартIирдай цалчин аьркин дайсса кьай-кьуй ва дуклаки оьрчIал чивчусса чагъарду.
Цикссагу лякъай Аьбдулкаримлул жула аьралитурал дакI дансса чаранну. Цимилгу гьан дунни дуклаки оьрчIал назмурду ккалаккисса видеортту. Аьралийтурал ххарину хьунаавкьунни ссайгъатирттащалсса Аьбдулкарим.
«Каспий» батальондалул командир, полковник Жамал Илиясовлул барчаллагь увкунни кумаг баврихлу.
Аьбдулкаримлул аьралийтурахь, дакI дансса ихтилатгу бувну, цIувххунни ссах мюхтажну буссарив, барчаллагь увкунни цала хьхьичI бивхьусса бигарду лайкьсса даражалий бартбигьлай буну тIий.
Командирнал кIицI лавгунни Дагъусттаннал халкь мудангу чIарав бацIлай бушиву ва хIакьинусса кьинигу укун чумартсса ва дугърисса инсантурал кумагирттайну ссахчIав мюхтажну бакъашиву.
– ДакIнийхтуну барчаллагьрай ура аьралийтурай дакI цIуцIисса, кумаг буллалисса инсантурайн, чагъарду чичлай, посылкарду тIайла дуклай, чIарав бацIлацIисса оьрчIайн. Жула халкьуннал «Каспий» батальондалун, цаймигу аьралий подразделениярттан, хасъсса операциялул гьурттучитуран чялиш бувккун кумаг буллай буссар. Зу кунмасса инсантал буссаксса, ххувшаву ласунсса вихшалагу ххишала хъанай дур, – увкунни Жамал Илиясовлул.
Шиккува кIицI лаган, хасъсса аьралий операциялул гьурттучитуран цимилагу кумаг бувссар ва буллайна ур Аьбдулкарим Айгунов ва ванал гьалмахтал.
Вай гьантрай ДР-лул бакIчи Сергей Меликовлул Аьбдулкарим Айгуновлун буллунни хьхьичIуннайшивурттахлусса Барчаллагьрал чагъар.
Имара Саидова
