Январданул 29-нний Кремлилуву Аьрасатнал президент Владимир Путин хьунаавкьунни Дагъусттаннал бакIчи Сергей Меликовлущал.

Республикалул каялувчинал паччахIлугърал бакIчинахь бувсунни региондалийсса тагьардания, экономикалул лябуккулул ва дагъусттанлувтурал оьрмулул даража лавай баврил цIаний дуллалисса давурттая.
Ларгсса шинал давурттал хIасиллу дуллай, Сергей Меликовлул тIимунийну, Дагъусттан хIакьину хьхьичIунмай хъанай бур щала билаятращал архIал. 2024-ку шинал 11 зурул ккаккиярттайн бувну, промышленностьраву лябукку хьуну бур 6,5 процентрал, шяраваллил хозяйствалуву – 7 процентраяргу ххишаласса.«Яла хъунмур хьхьичIуннайшиву му дур — жуща бювхъунни лахъ буван зузалтрал харжру. Экономикалуву харжру лахъ хьунни 15 процентрал, цIана дур 40 азарда къуруш. Ми бур номиналну ккаккан бувми, хIакьмур, канихьхьун булаймур харж бур 4,1- 4,2 процентрал лахъ бувсса», – кунни Дагъусттаннал бакIчинал.