Вай гьантрай «Дагестан» РИА-лий республикалул тIювалул инспекциялул каялувчи Сергей Касьяновлул пресс-конференция хьунни. Ванал журналистътурахь бувсунни 2024-ку шинал давурттал хIасиллая ва 2025-ку шинал дансса давурттая. Касьяновлул тIимунийну, ва идаралул хъунмур хьхьичIуннайшиву хъанай дур ЖКХ-лул бутIуву лиян давурттан хасну инсантурал лабизавуртту чан шаву. 2023-ку шинал диркIхьурча 5360 лабизаву, 2024-ку шинал диркIун дур 4023.
Му мукуннугу, захIматсса масъалартту уттигу ливчIун бур. ЧIявуквартирарду бусса къатрал 57% инсантурал бувсун бур цала къатравусса управляющий компаниярттал даврия рязи бакъа бушиву, 18% инсантурал кIицI бувну бур цалла къатрал тагьар зия хьуну душиву. Инсантурал чIявуми аьрзарду бур коммунал хIаллихшинну аьркинсса тагьарданий дуллай бакъашиврул хIакъиравусса, личIинува аьрзарду бур электричествалулгу, гъилишиврулгу, щиналгу багьайсса куццуй дузал къабуллай бушиврул хIакъиравусса.
Касьяновлул тIимунийну, гьашину лабизавуртту чан шаву дархIуну дур властьрал органнал ва ЖКХ-лул идарарттал давуртту мюнпат ххишалану дуллай бушивруцIун, хIаллихшинну дуллалисса идарарттащалсса дахIаву ххуй шаврицIун ва надзорданул мероприятияртту гужлан дуллай бушивруцIун.
Ванал мукунма бувсунни лиян давуртту даврийну дирхьуну душиву 5 млн 677,8 азарда къурушрал аькIри, къатIайлану хIисав бувсса коммунал хIаллихшиннахлусса багьри цIунилгу хIисав бувсса хьуну бур 6 миллиондалуха ливчусса.
Касьяновлул тIимунийну, щаллу буван аьркинсса масъаларттуну ливчIун бур квартирардал заллухъруннан ччай бакъашиву гьуртту хьун чIявуквартирарду бусса къатрал аьмсса хъуслий каялувшиву дуллан ва мукунма микку-тикку къатри дуллалаврил (точечные застройки) масъалартту.
2025-ку шинал дансса давурттал хIакъираву, Касьяновлул бусаврийну, гьарца нюжмардий управляющая компаниялул инсантал кьамул буллан тIий бур личIи-личIисса масъаларттал хIакъираву. Мунил ялув бацIаву дуллан тIий бур. Агарда му тIалавшин бартдигьлай бакъахьурча, управляющая организациялул каялувчи кIункIу увантIий бур административ танмихIрайн.
Мукунма сакин буван тIий бур къатрал собственниктурал жаваблувсса институт, мунивун бувхсса инсантал гьуртту хьунтIий бур чIявуквартирарду бусса къатрал каялувшиврий ва лахьлан тIий бур цала ихтиярду ва буржлувшивуртту.
ХIасан Аьдилов
