Жула миллатрава цикссагу бувккунни хъунисса даражалул вузирттал пахру-ххарану хъанахъисса выпускниктал.
Къабардин-Балкьарнаву Баксан шагьрулий ялапар хъанахъисса ЧIурттащиял шяравасса Малик ва Марина Хасаевхъал кулпатрая, миннал тарбия бувсса, эбратрансса жагьилтурая жу хьхьичIвагу чивчуссия.
Вайннал арс Зубер Хасаев, мусил медальданий Баксаннайсса 4-мур школагу къуртал бувну, увххун ур Краснодардал МВД-лул академиялувун. ЯтIул дипломрай академиягу бувккуну, зий ур участковый уполномоченныйну. БувчIлачIисса зат бур школагу, вузгу хьхьичIунсса хIасиллай къуртал бан хъунмасса бюхъугу, захIматгу бишин аьркиншиву.
Зубер чIивинияцIава спорт ххирасса, личIи-личIисса журардал спортрахун агьсса оьрчI ур. Школалий дуклакисса шиннардий занай ивкIун ур лачIун буккаврил секциялийн. Жура-журасса бяст-ччаллаву гьуртту хьуну, хьхьичIунсса кIанттурду бугьайсса бивкIун бур. Оьрмулул 13 шинаву лачIун уккаврил спортрал мастер хьуну ур. Махъсса шиннардий ва стритлифтинг тIисса спортрахун агьну ур. 2022-ку шинал Ставропольлай хьусса Аьрасатнал чемпионатрай ххув хьуну ур. Шикку 1-мур кIанугу бувгьуну, Зубер гьуртту хьуну ур Москавлив Дунияллул чемпионатрай. Шиккугу ванал 78 килорал кIушиву дусса спортсментурал дянив 1-мур кIану бувгьуну бур. 2024-ку шинал ноябрьданул ахирданий хьусса стритлифтинграл соревнованиярттай Зубер Дунияллул чемпион хьуну ур. ХIасил, жагьилсса оьрмулий ва стритлифтинграл спортрал Дунияллул кIийла чемпион хьуну ур.
Хасаевхъал оьрчIру, дуккавриву бакъассагу, итххявхсса бур спортрал чулухунмайгу. Цивппа Ватандалия архну ялапар хъанай бунугу, дакIнийхтуну ххирар вайннан лакку мазгу, буттал кIанугу.
Зубер ур мяърипат дусса, жаваблувсса, дакI хъинсса жагьил.
Ванал уссу Салимгу ванахава лавхьхьусса, хьхьичIун ливчусса, итххявхсса жагьил ур. Лавайсса баллай ЕГЭ-рду дуллусса, школа хьхьичIунну къуртал бувсса Салим, хIакьину Москавуллал связьрал ва информатикалул технический университетрал яла итххявхми студентътурал дянив ур. ЦIана ва дуклай ур 3-мур курсирай. Салимгу дуккавривугу, спортравугу итххявхсса жагьил ур. Вузраву ва чялишну гьуртту хъанай ур цинярдагу мероприятиярттавух.
Дуклакисса шиннардий Москавуллал вузирдал дянивсса армрестлинграл соревнованиярттай ва шамийла чемпион хьуну ур. Владиккавкказнаву 300-нния ливчусса спортсментал гьуртту хьусса армрестлинграл первенствалий ххув хьусса Салим тти гьуртту хьунтIиссар Орел шагьрулий хьунтIисса Аьрасатнал первенствалий.
Ванал школалий дуклакинийгу, спортрал бяст-ччаллай бакъагу, Баксаннай хьусса шахматирттал турнирдай мудан хьхьичIунсса кIанттурду бугьайсса бивкIун бур. Нажагьсса бухьунссар уттисса жагьилтураву шахматру ххирасса, вайннуй буккан кIулсса. Телевидениялия интервью ласун бувкIминнал: «Щил лахьхьин буври вин шахматирттай уклан?», — куну, цIувххукун: «Ниттил нину Светланал лахьхьин бунни», – увкуну бур. Салим цIана хIадур хъанай ур Москавуллал вузирдал студентътурал дянив хьунтIисса шахматирттал турнирданийн.
Вайннала урч1ра шинавусса уссил МутIалислулгу, стритлифтинграл чемпионатрай цалчин ххувшаву ларсун, биттур дурну дур спортрал мастернал кандидатнал номартив. Ваналгу 14-15 шиннардивусса спортсментураяр ялавайсса бакъашиву ккаккан бунни цала гуж-кьуват.
Жагьилтурал ниттил Маринал ЯтIул дипломрай къуртал бувну бур 2 вуз. Буттал Маликлул, органнаву къуллугъ буллай, лайкь дурну дур цикссагу наградартту.
Ниттил нину Светлана бур Аьф-лул лайкь хьусса хIакин, 17-хъул шиннардий зий бивкIун бур Баксаннал райондалул азарханалул хъунмур хIакинну, цIана бур Райондалул азарханалул прививкарду дайсса кабинетрал заведующийну. Ванилгу ЯтIул дипломрай къуртал бувну бур Дагъусттаннал паччахIлугърал мединститут. Светланал хъунмасса бутIа бивхьуну бур душнил оьрчIру тарбия бавриву. Вайннал кулпатраву хъуннасса тIалавшинна дур куртIсса кIулшивуртту ласаврил чулухуннайсса.
Гьай-гьай, укунсса нину-ппу, бава-ттаттахъул бусса кулпатраву тарбия хьусса оьрчIругу миннан лайкьсса бикIан аьркинни.
КIицI лавгсса куццуй, Хасаевхъал оьрчIру, дуккавриву бакъассагу, итххявхсса бур спортрал чулухунмайгу. Цивппа Ватандалия архну ялапар хъанай бунугу, дакIнийхтуну ххирар вайннан лакку мазгу, буттал кIанугу.
Хъуннасса вихшала дур вай жагьилтурал лайкь дантIисса чIяруми наградартту хьхьичI душиврийн ва вайнная миллатрал цIа-кьини бюхттул дансса хьхьичIунсса пишакартал хьунтIишиврий. Щак бакъар вайнная цала цIанихсса агьулданул ирс лайкьну буруччинсса, бусравсса инсантал хьуншиврийн.
Имара Саидова
