Каспийскалий, «Ястреб-Каспий» СОБР- ал базалий, хьунни Къизлардай ва Первомайскаллал шяраву (Хасавюртуллал район) оьзру хьуну 29 шин шаврин хас дурсса мероприятияртту.
Шикку гьуртту хьунни Росгвардиялул управлениялул «Ястреб-Каспий» СОБР-ал командир, полициялул полковник Запир Алискантов, «Скорпион-Каспий» ОМОН-лул командир, полициялул полковник Александр Гортыпанов ва хасъсса подразделениярттал аьралийтал. Запир Алискантовлул дакIнин бувтунни 1996-ку шинал январьданий къуллугърал бурж бартбигьлай жанну дуллусса Дагъусттаннал СОБР-лул 4 зузала: милицанал лейтенант Оьмар Аьзизов, милицанал лейтенант Ризван МахIаммадов, Марат Оьмаров ва ХIажи Хетуров.
– ХIакьинусса кьинигу лялиян бан захIматну бур 1996-ку шинал январьданий хьусса пашмансса ишру. Жула аьралий дустурал тай иширттаву чувшиврий бартбивгьуссар цала къуллугърал бурж. Ми бия хIакьсса патриотътал. Жунма ми абадлий дакIний бикIантIиссар. Жула буржри, терроризмалущал талай, укунсса ишру тикрал хьун къабитаву, – увкунни ванал.
Гьурттучитурал тIутIив дирхьунни жанну дуллусса зузалтрансса гьайкалдануцI, баян бунни минутрайсса пахъ багьаву.
ДакIнин бутан, 1996-ку шинал январьданул 9-нний Салман Радуев бакIчисса ярагъуннил алгусса 300 къачагъ ххявхссар Къизлардайн. Шагьрулул азарханалувун бувххун, ширишилун бувгьуссар 300-нния ливчусса инсантал. Хъирив кьини, ми хьхьичI бавкьуну, 9 автобусрай Чачаннавун бавчуссар.
Хасавюртуллал райондалий Первомайское шяраваллил зумакъирагърай миннан ххуллу кьувкьуссар федерал гужирдал.
Январьданул 15-нний хъунисри ва ширишилун бувгьусса милицанал зузалт къачагътурал аьщун бивзсса кIул шайхту, шяраваллийн гьужум бувссар. Вай иширттаву аьмну 80 инсан оьрмурдацIа хьуссар. Миннаву бивкIссар ихтиярду дуруччай органнал ва хасъсса подразделениярттал зузалт, аьралийтал.174 инсаннайн щавурду дирссар.
