Гьашину жула билаятрай кIицI лаган тIий дур Буттал КIанттул цIанийсса Хъунмасса дяъвилий ххувшаву ларсун 80 шин. Ва иширацIун бавхIуну, ПаччахIлугърал бакIчинал баян бунни 2025-ку шин Ватан дуруччул шинну.
Бюхттулсса Ххувшаврил юбилейрал хьунийн билаятрай дайдирхьунни проект «Музыкалул бессмертный полк «Голоса Героев».
Проект итадаркьунни хIакьину дяъвилул ишру нанисса Курскрай, 1943-ку шинал кунма, виричувну душманнайн данди бацIаврийну Аьрасатнал агьалинал кьянкьашиврул ва бух бан къашайшиврул лишанну хьусса шагьру-виричулив. Курск шагьрулуха балайрду тIий бур, жула билаятрай бакъасса, дазул кьатIувгу.
«Вирттаврал чIурду» тIисса Дунияллул халкьуннал дянивсса музыкалул ва патриот зумунусса проектрал цачIун бунни хасъсса аьралий операциялий ватандалул мурадру буручлачиминнал кулпатру.
Проектрай каялувшиву дуллай ур СВО-лул Аьрасатнал цалчинсса Виричу НурмахIаммад ХIажимахIаммадовлул ппу, Чувшиврул шанна ордендалул кавалер, полициялул полковник Энгельс ХIажимахIаммадов.
«Гьашину ттуй бивхьунни бюхттулсса бурж – каялувшиву дан «Голоса Героев» тIисса музыкалул БивкIу бакъа полкрай. Ва проектрал цачIун буллай бур, Аьрасатнаву бакъасса, дазул кьатIув ялапар хъанахъисса миллионну инсантуралгу. Миннал щаллу буллан тIий бур ватандалул мурадру буруччаврил ххуллий виртталну жанну дуллусса ва хIакьину жанну хIайп къакуну ватандалухлу талатисса вирттаврахасса балайрду. Ва ватандалухлу жанну дуллусса жула ппухълуннал аьпари. Жува дунияллий фашизм духлаган дурсса никирал наслуру, ппухълуннал аманатрайн хиянат къавхьусса ва къахьунтIисса.
БивкIу бакъа полкрал музыка Аьрасатнал агьалинал цашиврул ва кьуватрал лишанну хьуннав. ЦачIу жува буруччинну Хъун дяъвилиясса хIакьмур, му никирая никирайн лавсун бачиншиврул, бюхттулсса Ххувшаву жула ппухълуннан цукунсса кьиматран дарцIуссарив щилчIав щак къаличIансса куццуй. Цашиврувур жула гуж! Ххувшаву журар ласунтIисса!» – тIий ур Энгельс ХIажимахIаммадов.
Зулайхат Тахакьаева
