Москавливсса Дагъусттаннал Культуралул центрданул президиумрал член, Мариян Илиясовал цIанийсса «Дараччи» фондрал Москавливмур фондрал хъунмур Мариян Кьаландарова ччя-ччяни бияй «Дельфин» тIисса лагерьданийсса Палестиннавасса лихъачалтрачIан, вайннан аьркинмур, дуки-хIачIия диян дуван.

ЦIусса шинал байрандалул гьантрай Марияннул 80 оьрчIансса нацIу-кьацIулул кьуцуртту биян бунни. Ва хъинсса акциялуву гьуртту хьунни ванил ссурвал Шикаят ва Жумагу, «Дараччилул» активисткахъулгу. «Палестиннал оьрчIан цивппа гъурбатрай бушиву хъамабитан бансса ци хIарачат булларчагу, республикалул хъуниминнал бикIу, дакIру ххуйсса инсантурал бикIу, тайннал дакIурдива ватандалуцIа шаврил къюву къадукканссар, къадуккантIишиву чIалайгу бур. Жун дакIру къумасса оьрчIан байрандалул лахIзавагу пишкаш буван ччай бия. Кьини дурксса Палестиннал агьалинангу, СВО-лий гьуртту хъанахъиминнангу, хъанахъиминнал кулпатирттангу кумаг буван ччими гьарза хьуннав. Барчаллагьрай бура мудан чялишну хIала буххайминнайн, ка-кумаг аьркиншиву чIалай, тийнмайну бацIан къашайминнай. Гульшан Хасаева бакIчину «Дараччилул» душругу ка кIидахIин анавар буккай, ттунмагу кьини дурксса агьлу рязи буван ччан бикIай», – тIий бур Мариян.
Юсуп тIисса оьрчI барчаллагьрай ия нацIу-кьацIулул кьуцурттаву Израильналсса дакъа тIий. Палестиннал Лихъачалтрал кулпатиртталсса буллалисса комитетрал каялувчигу барчаллагьрай ия цалва оьрчIал дакIурдивун ххаришиву дуртсса ссайгъатирттащал бучIаврихлу.
«Дельфин» лагерьданий Мариянгу, ванищал бучIаймигу цинявннан кIулли. Марияннун цинмагу лихъачалтрал оьрмурдая, цуманан циксса ккавкссарив, щил бакIрачIан ци бувкIссарив кIулли. Щин-бунугу кумаг аьркин багьсса чIумал Марияннуйн баян байсса бур, ва цуппагу баян баннин къабавцIуну бияй вайнначIан. «Лихъачалтрал ялун къабивну цахъис чIун чIарах дуккарча, дакI паракьат дакъа дикIай», – тIий бур.
ПатIимат Рамазанова