ЦIусса шинал хьунин Да­гъусттаннал культуралул министр Зарема Буттаева бивунни «Забота» цIанилусса школа-интернатрайн. Ванищал архIал мушакъатсса оьрчIру ялун нанисса байрандалущал барча буван ва вайннан бахшишру дулун увкIун ия Дагъусттаннал Республикалул Халкьуннал Мажлисрал Культуралул, жагьилтурал иширттал, спортрал ва туризмалул комитетрал председатель Мурат Пайзуллаевгу.
ЛяличIисса оьрчIан ва кьини, цIушинацIун бавхIусса хъин-хъинсса ихтилатирттацIун ва нацIусса бахшиширттацIун, дакIний ливчIунни магьлул билаятрайнсса «аьрххигу». Ва кьини вайннан Дагъусттаннал паччахIлугърал ссихьрал театрданул ккаккан дурна «Новогодние приключения лесных зверей» программа. ОьрчIачIан хъамалу бувкIун бия Дякъил Ттатта, Марххаладуш, БарцI, ЦулчIа ва магьравасса цаймигу персонажру.
«Забота» школа-интернатрал директор Ума Качалова ва махъсса щалвагу коллектив хъунмасса барчаллагьрай бия Зарема Буттаевайн, Мурат Пайзуллаевлуйн ва Ссихьрал театрданул творчествалул командалийн оьрчIах дурсса къулагъасрахлу.
Бадрижамал Аьлиева