Вай гьантрай ЦIуссалакрал райондалул Мажлисрал председатель Аслодин Аслудинов лайкь хьунни «За содействие СВО» тIисса медальданун. Ванияр хьхьичIгу Аслодиннун дуллуссия «Операция по денафикации и демилитаризации Украины» тIисса, аьралитуран чялишсса кумаг буллалиминнан дулайсса медаль. Аслодиннун ва медаль дуллуну дур 58-мур полкрал аьралуннал командованиялул чулуха.Аслодин Аслудиновлуйн цимилгу бувкIунни аьралитурансса кумаграхлу Барчаллагьрал чагъарду. Миннувух бур 70-мур мотострелковый полкрал аьралитурал чулухассагу.
«ДакIнийхтуну асар хьунни жухара дуллалисса аякьа.
ХIакьинусса кьини ина кунма чумартсса инсантурал дуллалисса давурттан багьа бакъассар. Ина кунмасса патриотътал махъ буссаксса, ххувшаву ласунтIишиврийнсса вихшалагу цIакь хъанай дур. ЧIа тIий буру вин гьарица ишираву тIайлабацIу. ЛичIинува барчаллагьрай ур полкрал командир, гвардиялул полковник А. Хабилов», – тIий, чивчуну бур чагъарданий.
Шиккува кIицI лаган, Украиннал аьрщарай хасъсса аьралий операция байбивхьуния шийнмай Аслодин ва ванал уссурвал бур дуки-хIачIия, автотранспорт, москитный сеткарду, рацияртту, прицепру, генераторду ва цаймигу кьай-кьуй тIайла дуклай. Хасъсса аьралий операциялул гьурттучитуран бакъассагу, миннал кулпатирттангу кумаг бувссар ва буллайнма буссар уссурвал Аслудиновхъул.
Аьралитуран кумаг баврихлу Аслодин цимилагу лайкь хьуссар аьралий командованиялул ва ДР-лул бакIчи Сергей Меликовлул чулухасса Барчаллагьрал чагъардан.
