2024 шинал Аьрасатнаву баян бувсса Кулпатрал шинан хасну, ттун дакIнин багьунни чIявучин ххуйну кIулсса, эбратну оьрчIру тарбия бувсса, Ваччиял шяравасса МахIаммадхIажи Маккуевхъал кулпатрая бусан.

Ккуллал райондалий цалчин «Нину-виричу» тIисса, бусравсса цIа ларсъсса хъамитайпа бивкIун бур ванал нину Жавагьи Маккуева. Гьарицагу инсаннал оьрмулуву агьаммур кIану бугьай ниттил. Жавагьи ляличIисса хъамитайпа бивкIун бур. Ванил цила лас Асадуллагьлущал хъуни бувну бур 13 оьрчI. Цуксса сахаватлувсса хъамитайпа бухьунссия ва, тай захIматсса дяъвилул шиннардий цилвагу 11 оьрчI бусса, хъунмасса кулпат бунува, нину-ппу бакъа ятинну ливчIсса 2 душ бувцуну, хъунмагу бувну, щаргу буллуну бур.
Дяъви байбивхьусса шинал Асадуллагьлун диркIун дур 36 шин. Хушрай аьрай наниминнавух вагу лавгун ур. Шяраваллил советрай каялувшиву дансса инсан акъа, даврил сант кIулсса, бюхъу-бажар бусса Асадуллагь военкоматрая зана ивтун ур.

Ваччиял шяравугу, райондалийгу бусравну ва хIур­мат-кьиматрай ивкIсса Асадуллагь тамансса шиннардий зий ивкIссар Ваччиял шяраваллил советрал председательну, Ккуллал райондалул райпорал председательну. ИвкIссар Сталиннул цIанийсса «Конституция» тIисса артельданул хъунама бухгалтернугу.
1928-1930-ку шиннардий Асадуллагьлул хъунмасса захIмат бивхьуссар райондалийсса агьалинан буккин-чичин лахьхьин буллай. 1935-1937-ку шиннардий зий ивкIссар Ккуллал райондалул райпорал завскладну.

ТIайла бавцIусса, нитти-буттайн икрамрайсса хьуну бур вайннал оьрчIругу. Нитти-буттал ва оьрчIал дянивсса арарду нахIу-хIалимсса, цинявннан эбратрансса дирк1ун дур. Мюрщину бунува куннах кув ччаву дуну тарбия бувсса оьрчIру хIакьинусса кьинигу цаннал ца бувгьуну ялапар хъанай бур.
Гьай-гьай, нитти-буттан хъуннасса хъар лахъан багьну бур оьрчIан лайкьсса тарбия дулун, оьрмулул ххуллийн бичин.
– Жула оьрмулуву агьамсса кIану бувгьусса инсантал дунияллий бакъанугу, ми тачIав дакIния къабуккайссар ва гьарица бивзсса шаттираву жущала архIал буссар, хаснува нину-ппу. Ппу мудан даврил къайгъурду хьхьичIун лавсун икIайва, пенсиялийн укканцIа цалвагу отпуск лавсун, игьалавгсса чIун дакIний дакъар. Дяъвилул шиннардий хъиннува захIматну бикIайва кулпат дуки-хIачIиялул, лахху-ликкулул дузал бан. Дяъви байбивхьусса шинал хъунмур ссин, Зубайдатлун, дурагу 10 шин дия, чIанма-чIивимур ссин ца шин дия. Кулпатраву дяъвилул шиннардий бувна ялагу 2 оьрчI.
Я ниттил, я буттал ичIурасса давуртту хъаннилли ягу арамтуралли къаучайва, бавкьуну дуллан бикIайва. Ппу чIярумур чIумал давурттайх кьатIу-шав икIайва, оьрчIру тарбия баву ни­ттихун дагьайва, – тIий ур МахIаммадхIажи.

Маккуевхъал кулпатраву нитти-буттал чулухунмайсса хIур­мат-кьимат мудангу лавайсса бивкIссар. Нитти-буттал бивхьусса тарбиялул гьану цIакьсса хьуну бур. Вайннал кулпатрава 10-ннал ларсун дур лавайсса даражалул кIулшивуртту. ХIакьинусса кьинигу вай зий бур бусравсса пишардай.
МахIаммадхIажи Маккуевлул щала оьрму оьрчIан кIулшиву дулаврин ва тарбия баврин хас бувну бур. Ванал 30 шин дурну дур МахIачкъалаллал 22-мур школалул директорну зий. Шикку зузисса хIаллай ванал цайнна дурсса вихшала давурттайну цIакь дурну дур. ЧIирисса чIумул мутталий школалул къатригу цIу дуккан дурну, чIярусса хъин чулиннайсса дахханашивурттугу дурну дур. Шанма сменалий зий бивкIсса школа бувтун бур ца сменалийн, тIивтIуну бур дарсирдансса кабинетру. Республикалий цалчин вайннал дихьлан бивкIун бур дарсру 5 кьини. Школалийн учIаннингу МахIаммадхIажи ивкIун ур Дагъусттаннал паччахIлугърал педагогикалул институтраву ингилис мазрал дарсру дихьлай. МахIаммадхIажинал дур «ДР-лул лайкь хьусса учитель», «Аьрасатнал кIулшивуртту дулаврил отличник» тIисса цIарду. Ва хъанай ур Республикалул педагогикалул захIматрал ветерантурал ва насихIатчитурал советрал председатель. ХIакьинусса кьинигу тIалавну бур ванал оьрмулул ва пишалул авадансса опыт.
Хъунма-хъунмур ссу Зубайдат райком комсомолданий зий бивкIун бур. Зумрат, Москавлив Культуралул институтгу къуртал бувну, зий бивкIун бур райондалул библиотекалул хъунмурну. Саманият, Дагъусттаннал медициналул институтгу къуртал бувну, 50-хъул шиннардий зий бивкIун бур МахIачкъалаллал Муххал ххуллул азарханалий. Хъунама уссил Макьсудлул бувккуну бур Дагъусттаннал паччахIлугърал университетрал физикалул факультет, зий ивкIун ур Къизилюртуллал райондалийсса школардай. Макьсуд Дагъусттаннал мединститутраву 40-нния лирчусса шиннардий дарсру дихьлай ивкIун ур. Гулжанат, Медучилищагу бувккуну, 40-нния лирчусса шиннардий зий бивкIун бур МахIачкъалаллал роддомрай. МахIаммад Стоматологиялул поликлиникалул хъунама хIакиннал хъиривчуну зий ивкIун ур. Асият, Шяраваллил хозяйствалул институтгу къуртал бувну, экономистнал пишалий зий бивкIун бур. Рамазан, Мединститутгу къуртал бувну, ккарччал хIакинну, медучилищалуву дарсру дихьлай ивкIун ур. ХIамзат, Дагъусттаннал паччахIлугърал университетрал математикалул факультетгу къуртал бувну, МахIачкъалалив Автодорожный колледжраву дарсру дихьлай ивкIун ур.
– Кьянатсса шартIирдай оьрму бутлай бивкIсса жула нину-ппу ттун вирттавраха лащай, – тIий, тай чIунну дакIнин дичлай ур МахIаммадхIажи Маккуев.
Ванал цалвагу, лайкьсса тарбиягу дуллуну, чивун буккан бувну бур 5 оьрчI. ХIакьинусса кьини ванал оьрчIру цивппа зузисса давурттай бусравсса, ххаллилсса пишакартал бур. Шиккува бусан, МахIаммадхIажинал сакин дурну дур Маккуевхъал авладрал 7 никирайсса нясав.
Мяйжаннугу, бигьану къа­бивкIссар хIукуматрал чулуха­сса цукунчIавсса ка-кумаг бакъа, хьхьуния кьини дурну, хъуруннай, лухччай зий, ятту-гъаттара ябуллай, ичIаллилссагу бувну, колхозравугу зий, оьрчIру хъуни буллан. Дяъви къуртал хьусса, экономика хьхьара дурксса чIумал кулпатирттансса, оьрчIансса хIаллихшиннарду дансса каши къадиркIссар хIукуматрахь.

Укун захIматсса кьинирду чувшиврий лархъссар жула нитти-буттал, уссур-ссуннал. Бюхъай буккултран пикри багьан, та ппурттуву захIматшивуртту духIлахIисса кулпатру цикссагу бикIссар тIисса. Гьай-гьай, диркIссар кьянатсса чIуннугу, цикссагу кулпатирттан багьссар духIан чIярусса захIматшивурттугу.
Имара Саидова