Та-бухьурчангу, лакрал миллат машгьурди элму дурккусса, за кIулсса инсантурайну, хъин-хъинсса пишакартурайну. Лакраву чIявур элмурдал кандидатътал ва доктортал. Вай гьантрай укунминнал сияхIрай ца цIа ттигу ххи хьунни. Декабрьданул 12-нний Москавлив элмурдал кандидатшиврийнсса диссертация дурурччунни МахIачкъалаллал клиникалул азарханалул хъунама хIакин, Ккуллал шяравасса Аьлиев АхIмад Кьурбаннул арснал.
Ванал элмийсса даврин цIагу дур «Оптимизация медико-социальной помощи и реабилитации пациентов старших возрастных групп с синдромом гипомобильности» тIисса. Ва даву АхIмадлул дурурччунни И.М. Сеченовлул цIанийсса Москавуллал паччахIлугърал цалчинсса медициналул университетраву. Ванал элмийсса каялувчиталну бивкIссар РАН-лул академик, медициналул элмурдал доктор, профессор Пузин Сергей Никифорович ва медициналул элмурдал доктор, доцент Владимирова Оксана Николаевна.
2023 шинал АхIмад Аьлиевлун дуллуну дур «ЦIуллу-сагъшиву дуруччаврил лайкь хьусса зузала» цIа ва «Аьрасатнал бусравсса гражданин» тIисса жяматийсса орден.
Увну ур АхIмад ЦIуссалакрал райондалий ЦIуссачIурттащиял шяраву Ккуллал райондалийсса Ккуллал шяравасса Кьурбаннул ва ЦIуйшиял шяравасса Светланал кулпатраву.
1990-ку шинал вайннал кулпат бивзун бур Ставрополлал крайрайн, Нефтекумский райондалийсса МахIмуд-Мектеб шяравун. АхIмадлул шикку къуртал бувну бур дянивмур даражалул школа. Увххун ур Ставрополлал паччахIлугърал медициналул университетравун. Вагу къуртал бувну, захIматрал ххуллу байбивхьуну бур Ставрополлал улклул № 1 психиатриялул азарханалий хIакин-психиатрну зий.
АхIмадлул агьулданий ваниннин медиктал къабивкIун ур, ва хъанай ур ва ххуллу язи бувгьусса цалчинма. Ва ххуллу язи бугьаврийну АхIмадлул цала ниттил, Светланал, ччянивасса хиял щаллу бувну бур – цания-ца арсная хIакин хьуну ччива тIисса. Ванал цалвагу школалий дуклакисса чIумалва бивкIун бур хIакин хьунсса хиял. 2009-ку шинал зана хьуну ур тарихийсса ватандалийн. Зун ивкIун ур Республикалул психоневрологический диспансерданул отделениялул заведующийну. 2015-ку шиная шийнай АхIмад каялувшиву дуллай ур «Южный окружной медицинский центр» ФГБУ-лул МахIачкъалаллал клиникалул азарханалий (инсантураву «Портовская больница» тIий кIулсса).
Бувсса захIматрахлу лайкь хьуну ур личIи-личIисса наградарттан: 2018-ку шинал – Дагъусттаннал халкьуннал цIаний бувсса захIматрахлу ванан дуллуну дур «Дагъусттаннал халкьуннал виричу» тIисса цIа; 2019-ку шинал – «Отличник здравоохранения» лишан.
2023 шинал АхIмад Кьурбановичлун дуллуну дур «ЦIуллу-сагъшиву дуруччаврил лайкь хьусса зузала» цIа ва «Аьрасатнал бусравсса гражданин» тIисса жяматийсса орден.
Уттигъанну лавайсса даражалий дурурччусса медициналул элмурдал кандидатнал цIагу барча тIий, чIа тIий буру АхIмад Кьурбановичлун цIу-цIусса бюхттулшивурттайн лахъансса цIакьсса цIуллу-сагъшиву, гьавас, кулпатраву нахIушиву.
«Илчи» кказитрал номердавасса цания-цанний дикIантIиссар АхIмад Кьурбановичлущалсса интервью.
Бадрижамал Аьлиева
