ЦIуссаккуллал шяравасса Руслан Рамазанов, хасъсса аьралий операциялий Ватандалул мурадру буручлачаврицIун, архIала кумаг буллай ур Донецкаллал ва Луганскаллал Республикардал агьулданунгу.

Цала доходрал хъунмур бутIа ванал харж буллай ур Луганскаллал медициналул учреждениярттан, гуманитар кумагращал ва лагай оьрчIал интернатирттайн ва кумаг бай ахIвал кIюласса кулпатирттан. ЦIусса шинал Русланнул сакин бунни музыкалул школалул дуклаки оьрчIан байрандалул мажлис. Чун най ухьурчагу, ва дачIрасса каруннищал къалагай.
Уттигъанну, чIявусса оьрчIру бусса цуппалусса хъамитайпалун кумаг аьркин багьлай бушиву бавну, Руслан лавгун ур оьрчIан янна-ка, игрушкартту ва нацIу-кьацIу ларсун. Кулпатраву бур 6 оьрчI, миннава 3 — хъуни бан бувцусса.
Вайва гьантрай Луганскаллал Республикалийсса ца азарханалийн ванал биян бувну бур аьркинсса даруртту ва къашайшалтран къулайшиву дусса кроватьру.
ДакIнин бутан, 1999-ку шинал, ЦIуссалакрал райондалийн боевиктал ххявхсса чIумал, 19 шинавусса Руслан буттал шяравалу дуручлай ивкIссар. Та ппурттуву жагьилнан боевиктурал кьюлтI бувсса ярагъ, лявкъуну, цамур кIанттурдай лабивтун бивкIссар. Сант дирияйхту, ополчентурахьхьун буллуссар.
ЦIанагу ва нигь-ццах дакъа аьралий бигарду бартбигьлай, щавурду дирми ххассал буллай ур, архIала Донбасуллал ва Новороссиянал халкьуннангу кумаг буллай.
Андриана Аьбдуллаева