ЦIусса шинал байран хасъсса аьралий операциялий гьуртту хъанахъисса аьралитурахь барчагу дурну, ххуйсса кумаггу биян бувну увкIунни МахIачкъала шагьрулул 49-мур школалул директор Аьбдулкарим Айгунов.

Шиккува кIицI лаган, кутIа­сса чIумул мутталий Аьбдулкаримлул шамилчинни аьралитуран кумаг буллалисса. Цала чулухасса кумаг бунни ванал Луганскаллал Халкьуннал Республикалий, Курский ва Белгородский областирдай аьралий буржру бартбигьлагьисса «Каспий» тIисса Дагъусттаннал добровольчествалул цалчинсса батальондалул аьра­литуран.
АьралитурачIан ачин хьхьичI, Аьбдулкарим хьунаавкьунни МахIачкъала шагьрулул мэр Юсуп Умавовлущал. Бувсунни цува уттигу аьралитуран дуки-хIачIия, газрай лахъай­сса мюрщисса пачру, газрал баллонну, чIиллу, рацияртту, гъилисса янна, усру, медикаментру, захIматсса шартIирдай аьркин дагьайсса кьай-кьуй ва дуклаки оьрчIал чивчусса чагъарду лавсун най ушиву.
Аьралитурал ххарину хьунаавкьунни ссайгъатирттащал увкIсса, цахава аякьалийсса Аьбдулкарим.
«Каспий» батальондалул командир, полковник Жамал Илиясовлул цанма ка-кумаг баврихлу Барчаллагьрал чагъар буллунни Аьбдулкарим Айгуновлун. КIицI лавгунни Да­гъусттаннал агьали аьралитурал чIарав бацIлай бушиву. Бувккунни дуклаки оьрчIал чивчусса чагъарду.
Аьбдулкариннул, аьралитурал дакI дансса ихтилатгу бувну, цIувххунни ссах мюхтажну буссарив ва барчаллагь увкунни цала хьхьичI бивхьусса аьралий бигарду лайкьсса даражалий бартбигьлагьаврихлу.
Имара Саидова