Мазяйхъал Казбек
Буттал улклухь
Ссалам вийн, ттул аьзизсса, иминсса Лакку улчай! Кьамул ува на, къурталссарча ттул архсса ссапарду. Кьамул ува на, вила арс, я ттул буттал улчай; аьдатнугу ина вила арсру зана къахъанай, кьамул ува на. Я мукьай шювшусса ттул буттал улчай, кьамул дува утти вай ттулми макьгу, вичIа рутIайсса макьгума нацIусса дурча. Була, ттул буттал улчай, була ина ва ттул заэвсса чурххахьхьун гуж ва кьуват, дула ина ттул цалий къадарцIусса, вас-ццах тIисса дакIнихьхьун бюхттулсса тавпикь, рути ттувун ччаву; дуллуссарча ина вила цикссагу арсурвавран, дула ттухьхьунгу вила чувшиву, я ттул буттал улчай, Лакку Билаят!
Зунттал Нину
Ттула ниттин – Нинун
КьурукIи. Марххалттанул кIяла дурсса Маччайннал дара. Тик бивкIсса зунттул бурхIайх ларай, кIусса щалагу мукьах рирщуну, най дур бавкку-шавккусса, нигьачIисса жегъирххуллийх лухIисса янналувусса зунттал нину, най дур…
Я нину, я зунттал нину! Та ликкан даннакьай ина му кIусса гьиву вила бурхIая, ттигу къачIунссарив вин дигьалаган, цуксса хIаллай дачинна ина му ахир дакъасса жегъирххуллийх ларай? Та лякъинна ина винна рахIатну щядикIансса мина?.. Я нину, ина бувсcа захIматран лайкьсса балай жу ттигу къачичардухха, вин цIа кусса гьайкал жу ттигу чувчIав дацIан къадардухха… Я нину, вай жула зунттал хъач-бакIру дярххуну ларгун дурхха, вайгу вил хIасратрал мукьал дярххуну ларгривав? Вай жула гьандарав мариян-макь тIисса тIутIив хьунадакьайхха, вайгу вил кIирисса мукьал кIунтIай ххярххунавав? Я зунттал нину, чув лякъавкьай ина муксса заэвсса жандалий му гуж, чув лякъавкьай му цIакь, му кьувват? Я нину, буссаривкьай вила накIлищал инава жун буллусса мазраву виламур чувшиву кIицI дан бюхъайсса махъругу, жуща ми махъру ттинин лякъин къабювхъуннихха, буссарив мукунсса махъру жула мазраву, я зунттал нину?..
КьурукIи. Марххалттанул кIяла дурсса Маччайннал дара. Най дур ттул хьхьичI, кIусса щалагу мукьах рирщуну, лухIисса янналувусса зунттал нину, най дур. Най ура нагу кIанил хъирив, гьалакну дакIгу ришлай, най ура. Най ура ниттил хъирив бакIлавай, бакIлавай…
ЧIахIлул щютIуххи
НувчIа чарил хъархъаллай
Хъинну дакьай банавша,
Ттул чIахIлул щютIуххуллив
Гъалгъа тIутIи дай тIутIив,
ТIутIив гьай-гьайтIи дурну,
Балай тIутIи дай уртту.
Агь, ттул чIахIлул щютIуххий, бачу, уча ца балай, мякьну дурча ва ттул дакI ми вил хIикматсса чIурдах. Бунугу ттул дакIнива къявхъ тIий хIасратрал щатIи, ина, чIахIлул щютIуххий, нани да виватура вити-тирхсса макьанну, экьинани да хIаллих дюхлу куннасса никру, лалавсун ттул дакIнива яла марцIми асарду.
Нажагь бухьурча ттуву оьлувкъусса асарду, ина гай лицIан бити, вила чIу щялу къахьун, нажагь ттуву бухьурча бяйкьлакьисса пикрирду, ина гай бацIан бити, хIакьмур цалий бацIаннин; жура-жура хъанахъисса жагьил на акъахьувкун, жула жагъаласса чIурдал щил дакIри ххари дайсса?
Агь, ттул чIахIлул щютIуххий, ялагу вихь ца миннат: мадара хъис къулагъас ттул мюрш-кьюршсса къайгъурдах. Агар духьурча ттуву чIявучин хасъсса дардру, анжагъ му чIумал ина лаласи гай ттувату, бюхъайссарча вил чIунил даиман хъяхъимагу чансса хьхьичIун уруган ан, бюхъайссарча вил чIунил даиман пашманмагу чансса рахIат уккан ан.
КIачIа хьунни къурду
КIачIа хьунни къурду, гъав ларгунни ссав. Алвагь барзунтталгу бувтунни ябакI. Лавгунни Лаккуя циняв «дачникIтал». ЦIинцIал дуцIин дурну Маччайннал дара, пахъ багьунни марчгу, паракьат хьунни.
Най бур, аьтIий, кьиблалийнмай кьурукьру, най бур хьхьирийн, къявхъа тIий, щаращивгу, лерххун, най дур варанттул гъамардугу, най дур лерххун чунниврагу къакIулну.
Хъуннар хьусса ттул чIаххувщар Таигу щядиркIун дур, шанул ккик тIий, ларзулу. ТтарацIувсса кьамурдахгу уруглай, нагу ура жула ччарнил пикрирдай…
ДакIнингу багьунни ттула чIахIлул щютIуххи хар-хавар бакъа. Канил къабувгьуну цукссагу хIалли, дакIнийвагу бакъар чув бивхьуссарив. Ккаккайривав чIахIлул щютIуххунгу макI? Учиннуча: бувкIун ца пяду оьрватIи, цихьва щархьу тIий.
Ттун ччива
Ттун ччива жува кIиягу ца архсса, къюкIсса зунттал шяраву, щаращул щиннияр марцIсса гьава бусса жула буттахъал миналий. Ччива жула цIувцIу чарил къатригу, бюхттулсса ларзугу. Ччива жула ца ахъулссаннул багъгу. Ччива га багъраву ина тIутIив дугьлай: хъюрухъ багьсса гундарахIай, оьттул рангсса хъункIултIутIив, ттюнгъасса банавша-тIутIив.
Ччива ттун ялагу виха ва ттухава лавхьхьусса чIявусса оьрчIругу. Ччива навагу вищал архIал жула оьрчIру тарбия буллай, жула багъраха къуллугъ буллай, ччива авлий занай, цулун занай. Ччива жулла хъуннар хьусса нинугу буслай гайннахь вирттаврал гьунардая, жула буттахъал оьрмурдая.
Яла-яла ттун ччива, лахъисса кIинтнил хьхьурдай гъилисса тавлухгу щяивкIун, вила ва ттула ччаврия ца аьжаивсса кьисса чичин. Ччива га кьиссагу Лайли-Мажнуннул кьисса кунма, га чивчусса ттула цIагу щинчIав къакIулну, жула иминсса ччаврий инсантал махIатталгу хъанай, хIайрангу хъанай. Ттун укун ччива, яла ттун цичIав къаччива.
ХIави
Ттул буттал шяравалу Къян дуссар хьхьичIух ратIгу нанисса ца хъун бакъасса бакIуй. КIа щарнил кьабакIраву кIийгу буссар, ХIажил-Кьун тIий, ца хъунмасса кьун. КIанил чIаравгу буссар ца бюхттулсса хIави. Ца авурну чIалачIи дайхха кIа хIавилул жул шяравалу. Къужрал бусласаврийн бувну, кIа хIавилул ттуршлихъайсса шинну хьуну дур. ЦикIулли ци дугърисса, ци дакI марцIсса, ци ххуйшиву ххирасса адаминал бивщуну бивкIссарив.
Бакъасса кIану бакъар жул чIирисса шярава бувксса инсантал, гай бур Москавливгу, Ташкантливгу, Кивалийгу. Бур цимигу шинай цала буттал шяравун къабувкIссагу, бур бучIанмагу дакIний бакъассагу. Нажагь вай шагьрурдайн нава лавгни, на жула шяраватусса инсантурачIан икъавну къаикIара. Мякьну бикIай гайгу цала буттал шяраваллиясса хавардах вичIи дишин, цу ур, цу акъар тIий, цIухху-бусурду буллан бикIай. Амма гьарзадраяр хьхьичI гайннал ттухь цIуххай ца тяхъану: «КIа жула хIавигу кIиккува бурив?» – куну.
Амма мурхь вай махъсса шиннардий кьакьлай байбивхьуну бур. Цаппара шиннардивун щала кьавкьунгу гьанссар. На мурхь кьакьлай бур кувкун, шагьрурдайсса жул къян, ваца инсан ивкIунни кусса хавар бувсни кунма, пашман шай.
– Вагь! Яр, кIа кьакьлай къахъинахха, – учай гайннал, цакуну гъавгу лавгун.
Авгъуст
Жу, ца ххюя инсан, чIаххувсса шярава жижаралия най буссияв: га шяраву жун кIулсса щарссанил ца акъа-акъасса арс ивкIуну ия. Бия авгъуст зурул цалчинми гьантри. ЛачIа биявай бия, хъа ттихIлай байбивхьуну бия. Гьавагу тIутIайх бивчусса ттуккул цIил ва суврарал тухъсса кьункьал бувцIуну бия. Хъиннура тIааьнну дия гьаннаяту ришлашисса щаращал щинал дюхлулул кьанкьгу.
Жу, ххуллу кутIа бан, га шяраваллил багъравух хьуссияв. Мурхьру бивсса гьивчул, кякандалул, цIулитул, лахI-лахI тIий, бувцIуну бия. Так-тук хьунабакьайва ттигу биттун бувасса бяълилул мурхьругу. Авгъуст зуруй бяъли – вагу зунттал тIабиаьтран хасъсса ца аьламат. Шадну мурхьирдая мурхьирдайнгу лехлай, лелуххантгу ца байкъалитIайсса жянгъа бивхьуну бия, хъацIру ва цIитIикултгу цала бурулданул чагъантту бивщуну бия.
ТIааьнну бия га дюхлулсса багъраву, тIааьнну бия гай жула жяматрал инсантуращал, жула шяраваллил лугъатрайгу гъалгъа тIий, иминсса Лакку кIанттул жегъир ххуллурдайхгу най, пашмансса щугълурду бакIраву балглан. ДакIния буклай бакъая ниттил арснахасса зумалул махъругу:
Бюхттул зунтту левкьун,
Арду дурцIунни,
Ттул дакI гъюжу дурккун,
Хханхха бувцIунни.
Бия авгъуст зурул цалчинми гьантри. ЛачIа биявай бия, хъа ттихIлай байбивхьуну бия.
КъавтIий бур
цциган душ
Колокольчики звенят,
Барабанчики гремят,
А люди-то люди –
Ой люшеньки-люли!
А люди-то люди
На цыганочку глядят.
Пушкин
Синттугу руца-руцари дуллай, бивщуну бур гитара. Канихьсса ччергъилттал пирпиллу ва гюнгутIивгу зяр-зяртIи бувну, гюргутIи бувну бур хъаннилгу балай. Дазу-зума дакъа дакI цIунцIутIи дуллалисса, аьвзалзамана кунма, цIансса таборданул балай.
КъавтIий бур цциган душ…
Цал хIаллих, ца ухьттансса пашманшиврущал, яла анаварну, оьрчIи-кIурисса, кьачIа-кьачIа хъанахъисса гьартасса гьухъул жигурдугу ца исвагьину цила чурххащал къавтIи бувну, хъачIругу зурзутIи дурну, хъазамрайсса яхагу чIявукIулну зяр-зяртIи бувну, авлахърайх бивщусса ссутнил марч кунма, къавтIилул бущилий къавтIий бур.
КъавтIий бур цциган душ…
Циванни ва цциганнал балайлул ттул дакI вакссара укун цIюрукъин дуллалисса, циванни ва къавтIаврилгу на вакссава укун гьалак уккан уллалисса? Тамаша буллалими ялу-ялун ххари хъанай, тяхъа буклакийни, циванни ттулмур дакI, ялу-ялун пашман хъанай, цIунцIу тIисса?
КъавтIий бур цциган душ…
Ттул дакI ваксса цIунцIу тIисса, цIунцIугу тIий, хъювсул дуклакисса, цциган хъаннил хордануву лакрал балайлул леххаврил чIу баллай тIийрив? Ттул дакI вакса пашмансса, пашман хъанай, гьалак дуклакисса, цциган душнил къавтIавриву лакрал ссапалул бущи чIалай тIийрив? Жула буттахъал балайрдуния, къумасса ратIаву лявхъусса буну тIий, къумасса бухьунссар, илкинсса чуллай, майдан авлахъирттай загьир хьусса цциганнал балайрдавун жулами балайрдал хIасратгу чату дуркIривав?
КъавтIий бур цциган душ…
Дуниял уттарассар, оьрму абадссар тIий, зяр-зяр тIий дур ччергъилтту. Агь, оьрму панассар, пананугу ххаллилссар тIий, лахIахъа бивхьуну зума тIий бур хор. КьурукIинтнил замгьар кунма, ссинкь бахчуну бур гитара.
Га кьини
–Ва дунияллийн дагьсса пахъдагьру! Ва ци аьламатривавли? – тIий бия инсантал га тамашасса авгъуст зурул кьини, махIаттал хъанай.
Аьрщарай рухI зумувсса цичIардагу къалирчIсса хханссия. ЧачIав баллай бакъая я лелуххантрал, я ущу-щулгьилул цукунчIавсса чIукIа-чIитI. Няй-няй тIий баргъгу кIири бувну бия, га кIиришиврул гьавава бавцIуну нанисса хханссия. Циняв инсантуралгу, вичIивгу дарщуну, чурхру кIу хьуну бия. Цирив ца иш хьуну бия га кьини дунияллий.
Ца хIалатраву цакуну ца азгъунсса марч бивщуна, цакуну щала ссавгу лухIира-лухIисса ттуруллал дургьуна. Лухччи-ссав зурзутIи дурну, къув-аьс тIун диркIуна, иттату чани ласун буллалисса цIупарду цаннийх ца ришлан диркIуна.
– Ахирзаман бизлазиссарив, ва ци мусиватри? – тIий, хIалли-къурувсса халкьгу шаппа-шаппай ливхъун бавчуна.
Цакуну марчгу паракьат хьуна, ссавниясса лехха-личIавугу лагь хьуна. Цакуну парш бивхьуну кьяпрай марххалагу буллан бивкIуна. КIий, Лукка-Зунттул нуххардиву, зунттал авдалтуралгу ца яс тIивтIуна.
Дустал, га кьини шаэр ивкIуну ия.
