Декабрьданул 21-нний Дагъусттаннал ХIукуматрал председатель Аьбдулмуслим Аьбдулмуслимов гьуртту хьунни шадлугърал тагьарданий МахIачкъалалив Расул ХIамзатовлул проспектрай ЦIусса шинан хас дурсса ярмукIа тIитIаврий.
Шикку гьуртту хьунни мукунма вице-премьер Ризван ГъазимахIаммадов, МахIачкъалаллал бакIчи Юсуп Умавов, ДР-лул промышленностьрал ва машлул министр Низам Халилов. Миннал цачIу ххал бивгьунни ярмукIалул выставкардал кIанттурду, ххал дунни ккаккиялун дирхьусса бакIлахъия ва дукиялул сурсатру (продукция), ихтилатру бунни бакIлахъия даххан ларсун бувкIминнащал. ЯрмукIалий цалла бакIлахъия ва сурсатру дахлай бия сайки 30 компания, минначIа дия накIлил, дикIул, консерварттал сурсатру, сокру, ницI, мукунна халкьуннал художествалул касмурдал затру, сувенирду, ссихьри, арцул чIюлушивуртту, яттил луттирдая ва ппалуя дурсса лаххия ва цаймигу затру. Тарумовкаллал райондалиясса фермернал дахлай ия дикIул сурсатру, муначIа бия 17 кило дусса индюшкартту. Цама ишбажаранчи КьурбанхIажи МахIаевлучIа дия ппалул затру.
Аьбдулмуслим Аьбдулмуслимов ивунни «Анжелина» ООО агрохолдинграл машлул павильондалийн. Ва компаниялул Дарбантуллал райондалий 2015-ку шиная шиннай ххяххан дуллай бур ахъулсса ва хIаллил ахъулсса (ягоды).
ЦIусса шинан хас дурсса ярмукIалийсса сурсатирттащал кIул хьуну махъ Аьбдулмуслим Аьбдулмуслимовлул бувсунни ярмукIа сакин дурну душиву лавайсса даражалий ва барчаллагь увкунни Дагъусттаннал Минпромторграл каялувчинахь ва МахIачкъалаллал бакIчинахь даву сакин даврихлу.
Премьер-министрнал тапшур бунни ярмукIартту дуллан МахIачкъалаллал цаймигу кIанттурдай. Ванал мукунма тапшур бунни дикIул сурсатру ва ахъулсса гьарзану дучIан дуллан ярмукIарттайн.
ХI. Аьдилов
