Декабрьданул 20-нний МахIачкъалалив Дусшиврул къатраву хьунни Аьрасатнаву баян бувсса Кулпатрал шинал хIасиллу дуллалисса шадлугърал даражалийсса мажлис.
Шикку гьуртту хьунни Дагъусттаннал ХIукуматрал, Халкьуннал Мажлисрал вакилтал, Культуралул, ЗахIматрал, ЦIуллу-сагъшиву дуруччаврил министерстварттал зузалт, чIявусса оьрчIру бусса кулпатру ва хасъсса аьралий операциялий гьуртту хъанахъиминнал кулпатру.
ДакIнин бутан, Кулпатрал шин баян бувссия Аьрасатнал президентнал хIукмулийну. Ванил дайдихьу хьуссия январьданул 25-нний, «Родные – любимые» тIисса Щалагу Аьрасатнал форумрай. Тикку гьуртту хьуссия Дагъусттаннаясса МахIаммадаьлиевхъал ва Къазанбиевхъал кулпатру.
Мажлис байбивхьунни ДР-лул Халкьуннал Мажлисрал председатель Заур Аскандаровлул. Ванал кIицI лавгуна Кулпатрал шинал кумаграх мюхтажсса цинявппагу кулпатирттах ххишаласса аякьа диркIшиву. Му бакъассагу, кулпатирттал хIакъиравусса цинявппагу масъалартту паччахIлугърал социал политикалул хьхьичI ххуттайн лавсъсса масъаларттуну хъанай бивкIшиву. Барчаллагь увкунни хасъсса аьралий операциялий гьуртту хъанахъиминнал нитти-буттахь ва мачча-гъаннахь.
Заур Аскандаровлул паччахIлугърал наградартту дуллунни чIявусса оьрчIру бусса ва цачIу ялапар хъанай 40-нния лирчусса шинну хьусса эбратрансса кулпатирттан ва личIи-личIисса пишардал династиярдал вакилтуран. Сергей Меликовлул чулухасса Барчаллагьрал чагъар буллунни Дарбант шагьрулиясса Раджабовхъал кулпатран. Ва кьини мероприятиялийн бувкIун бия ХIаким ва Олеся Раджабовхъул цалва 5-гу оьрчIащал. Олесял бувсунни, 20 шинавусса хъунама арснал, Ильяслул, 2022-ку шинал Херсонский областьрай аьралий бигарду бартбигьлай къучагъну жан дуллушиву.
Дагъусттаннал вице-премьер АьбдурахIман МахIмудовлул бувсунни Кулпатрал шинал хIасиллая.
– ХIакьинусса кьини Дагъусттаннай 129 азарва кулпат бур чIявусса оьрчIру бусса. Вай кулпатирттан ккаккан дурну дуссар цанна хасъсса хIаллихшиннарду.
Шинал лажиндарай Кулпатрал шинан хас дурсса мероприятияртту республикалул шагьрурдай ва районнай хьуссар. Миннува яла ккалли дансса ва дакIний личIансса хьуссар Табасараннал, Хъунзахъиял районнай, Къизлар шагьрулий. Цинярдагу мероприятиярттай чялишсса гьурттушинна дурссар Дагъусттаннал ХIукуматрал председатель Аьбдулмуслим Аьбдулмуслимовлул, депутатътурал, муниципалитетирттал хъуниминнал, – увкунни АьбдурахIман МахIмудовлул.
Мероприятиялий ккаккан дурна Дагъусттаннал машгьурсса балайчитал, хореографиялул коллективру гьурттусса концертрал программа.
Мажлис наниссаксса хIаллай Дусшиврул къатрал жанахIраву тIиртIуну дия УнцIукIуллал усттартурал, Бархъаллал тIахIунттив дувултрал, Табасараннал халичартту щащултрал ва Кубачиял заргалтурал дурсса кьай-кьуйлул выставка.
Имара Саидова
