Укун учин бучIисса бия Лакрал театрдануву хьусса Дагъусттаннал бусравсса артист, цIанихсса музыкант, аранжировщик, композитор ва лакрал лирический балайчитураву хьхьичI ххуттай ишин лайкьсса Арслан Шагьмардановлул творчествалул мажлис-бенефис.
КIицI бан багьлай бухьунссар, махъсса шиннардий Арслан Шагьмарданов зий уссар Лакрал театрданул музыкалул бутIул каялувчину. Ванал каялувшиндаралу хьхьичIуннай хьунни артистътурал балай учаврил усттаршиву, лавай хьунни концертирттал даража, драмалул жагьилсса артистътураву ялун ливчунни ва итххявххунни балай учаврилссагу гьунар.
Му бакъассагу, Арсланнул музыка чивчуссар цаппарасса спектакльлан.
Балайчишиврий ва музыкантшиврий Арслан сий лахъну уссия 90-ку шиннардил дайдихьулий, аьпа биву, Мазагьиб Шариповлул каялувшиндаралусса «Хъусращи» ансамбльданул солистну усса чIумал.
1994-ку шинал Голландиянаву Дунияллул халкьуннал дянивсса фольклорданул фестивальданий Дагъусттаннал делегациялувух бивкIми дакIнин бутлан бикIай, Арсланнул чIунил ва такьвалул хIайран бувну бивкIшиву жюригу, гьуртту хъанахъисса балайчиталгу, тамашачиталгу. Сакиншинначитурал ванал «мусил чIунин» лавайсса кьимат бивщуну, дуллуну дур фестивальданул ларайсса премия «Мусил рикI».
Тания шинмай замана баххана хьунни, жулламур магьирлугъ иттала дагьну, чилмур нахIу ларчIун ляркъунни. Амма Арслан къаавцIуна мукун анаварсса бущилий ялун бивгьуну нанисса попсалул щатIухьхьун ириян. КъаавцIуна цува хъамаитангу. Цала вичIидихьултрайнгу хиянат къавхьуну, най ия ттизаманнул шартIирдай миллатрал язисса рувхIанийсса ххазина ябансса шаттирду ласлай, жагьилтуран аслисса лакку балайрдал, лакку макьаннал ххуйшиву ва нахIушиву кIул дуллай. Гьарца лакрал мероприятиялий, хIатта цала чIу ххуйну бакъасса чIумалгума, аккордеонгу канихьну увккун, цала чIунийну аслийсса лакку балайрду тIий, гьамин ванал хъарачатрайнур учивияв на лакран хъамабитала шавай ливчIсса лакку балайрду, хIакьину Лакрал театрданул артистътурал тIий, уттава буклай байбивхьусса. Мода тара-тагу лагайссар. ЛичIайссар так язимур, бивкIу бакъамур. Ванахха кIура баллай уттива ттигу жува жула аслийсса лакку балайрдайн. Ттуява гъалгъа тIурча, Арсланнул творчество бусса оьрмулий ххирану, цумур ласурчагу, ванал балайрдая мякь къаливххун, хханхха къабувччуну ливчIминнавасса ца нагура.
Ванал творчествалул хъунмур бутIа якъабуцанну бавхIуну бур цала ниттил, ПатIимат Шагьмардановал, творчествалуцIун. ЧIивисса оьрмулий цила шяраваллил агьулданущал гуж-къиялий буттал мина кьаритан бувну, эяллайн дурксса ТтурчIиял щарних аьтIисса, щала лакку билаятрах мякьсса шеърирдацIун лап даркьусса ва дюххансса макьаннугу чирчуну, ми балайрду ниттил яла къалагайсса къюву аьч данну, буттал улча яруннил хьхьичIух зананну учай Арсланнул.
КюлтI бан къашайсса гьавасращал увкунни ва хьхьунугу Арсланнул вай балайрду цала аккордеондалухун.
Увкуна Мазагьиб Шариповлул ва Камалуттин КьурбанмахIаммадовлул макьаннайсса лакрал чичултрал шеърирдава язи-язими бувчIуну. ДакIнин бивчуна цала творчествалуву агьамсса кIану бувгьусса композитортал, шаэртал ва балайчитал.
Балайчинал савлугъ хъун дан бувкIун бия ванал пишалул уртакьтал, цIанихсса балайчитал: Дагъусттаннал халкьуннал артистътал Лариса ХIажиева, Луиза Шагьдилова, Саният Рамазанова, Зульфия Архилаева, ЦIуссалакрал райондалул магьирлугърал къатрал ансамбль «Дараччи», гьалмахчу Абрек ХIажимурадов.
Ва хьхьуну тамашачитал цIунилгу хIайран бувуна Арсланнул цаннияр ца ялттусса гьунардал: балайчи, музыкант, композитор, артист…
Концерт дайдирхьуну, къуртал хьунцIа балайчитурахун руцлай бия музыкантътал ХIусайна ва Амрет ХIусайнаевхъул, Артур Аминов. Концерт дачин дурну ия Аьрасатнал лайкь хьусса артист Аслан МахIаммадов.
ЛяличIину яргсса, цIу бусса, тамашачитал асардай личIансса дия бенефис.
Зулайхат Тахакьаева
