Дагъусттаннал ХIукуматрал председатель Аьбдулмуслим Аьбдулмуслимовлул бувсунни 2024-ку шинал ДР-лул гьануми экономикалул ва социал лябуккулул ккаккиярттал хIакъираву.

«Шяраваллил хозяйствалул бакIлахъия ласаврил лагру гьашину январь-ноябрь зурдардий лахъ хьуну дур 228,7 млрд къуруширттал, ягу 106% (дукIу вара чIумух бурувгун лахъ хьуну дур 6%). Шяраваллил хозяйствалул лябукку шаву дархIуну дур паччахIлугърал чулухасса кумаграцIун, цаппара инвестициярттал проектру бартдигьаврицIун, жула хъузалтрал хIарачатирттацIун. Гьашину тарихраву личIансса ккаккияртту хьуну дур ппиринжрал бакIлахъия ласавриву – 165 азарда тонна, мукунна къюмайтIутIулсса ласавриву – 301,5 азарда тонна.
Строительствалул давуртту бартдигьаврил лагру гьашину 11 зурул дянив хьуну дур 189,8 млрд къуруш, дукIумур шинах бурувгун лахъ хьуну дур 2%.
Дурну дур 2,8 млн квадрат метрарду къатрал, дукIумур шинал дурминнуяр 2,2-ла гьарзану.
Розницалий маша баврил лагру гьашинусса 11 зуруй хьуну дур 801 млрд къуруширттая лирчусса, хьхьичIмур шиналнияр 1,4 % ххишаласса.
Агьалинан дулайсса багьлухсса хIаллихшиннал лагру январь – ноябрь зурдардий хьуну дур 190 млрд къуруширттая лирчусса, хьхьичIмур шинал вара чIумух бурувгун 3% ххишаласса.
Республикалий чан хьуну дур давуртту дакъа ливчIминнал аьдад. Гьашину декабрьданул 1-ннийнин даву дакъаминнал аьдад хьуну дур 7,7 азара инсан.
Хъинчулийсса дахханашивуртту хьуну дур кьатIаллищалсса экономикалул иширттавугу. Цалчинмур дачIишинал мутталий Дагъусттаннал хъус даххаврил лагру хьуну дур 161,21 млн доллар, хьхьичIмур шинал вара чIумух бурувгун лахъ хьуну дур 5%.
Промышленностьрал бутIуву хъус дуккан даву гьарза хьуну дур.
Гьашину Сулайман Стальскаллал райондалий тIивтIуну бур полимер турбарду байсса завод «Эксонор».
Республикалул масъалартту стратегиялул, комплексрал даражалий чан-чанну тIий дузал буллалаврил чIалачIи буллай бур муния мюнпат хъанай бушиву.
Гьай-гьай, жущава къахъанай бур вай давурттал хIасиллу гацIанара хьун дуван, цанчирча гьарца дахханашиврул тIалав дуллалиссар чIунгу, луртаннугу, давурттаву хIарачатгу. Амма хIакьину жунма чIалай бур, цуксса даххана хьуну дуссарив Дагъусттаннал экономикалул тагьар. Ва даву – республикалул ялун бучIантIимуниву бивхьусса захIматри ва ялун дучIансса никирттансса цIакьсса гьанур», – увкунни ДР-лул ХIукуматрал председательнал.