Журналист Халед аль-Хатыблул цIанийсса щаллагу дунияллул халкьуннал дянивсса премиялун лайкь хьуминнал цIарду рирщунни жюрилул вай гьантрай. Ва 2017-ку шинал Сириянаву даврил бурж биттур буллай унува террористътурал оьрмулуцIа увсса журналистнал цIанийсса премияр, гьар шинах дулайссар дяъвилул, питнардал кIанттурдавасса репортажирттахлу.
Гьашину СВО-лия, Палестиннавасса, Ливаннавасса ва Суданнавасса чIярусса репортажирттава язи дургьунни 3 журналистнал давуртту. Ххув хьусса 3-ннавух ур жула лаккучу, НТВ-лул аьралий корреспондент, Дагъусттаннал лайкь хьусса журналист Оьмар МахIаммадов. Донецкалий талатавуртту къизгъиннийсса Аьрасатнал огнеметчиктурал ванал дурсса репортажран бивщуну бур лахъсса кьимат. Оьмар МахIаммадов, оьрмулун нигьачIаву духьурчагу, СВО-лул цIарава репортажру дуллай, тикку хъанахъимуния хIакьну агьалинахь бусласисса, бюхъу-гьунар бусса журналист ур. Дяъвилул цIу къизгъинсса кIанттурдавасса ванал репортажру эфирданий чIалай, жул коллективгу мудангу дуаьрдай бикIайссар, цIуллуну-сагъну шавай зана хьуния, тIий. КIицI лаганна, ва СВО-лийминнан аьркинмунил, мюхтажмунил кумаг буллай ушиву ва хьхьичIвагу хъиншиврул-хъинбалардал ххуллийсса давривух чялишну хIала ухлай ивк1шиву. Хаснува къашавайсса оьрчIру ххари бувансса давурттайнугу кIулшиву оьрчIал нитти-буттахъан. ИхIсандалулмур давугу хIисавравун ларсун, чIурчIав дуванна, журналист Халедгу, Оьмар куна, ятинтуран, къашавайсса оьрчIан, мюхтажминнан кумаг буллалисса инсан ивкIшиврий. Сийлийсса конкурсрал жюрилул хъунмур бур RT-лул ва «Россия сегодня» медиагруппалул хъунама редактор Маргарита Симоньян. Жюрилуву бур аьралий корреспондентътал, RT-лул журналист, Саргон Хадая ва ВГРК-лул журналист, Аьрасатнал Виричу Евгений Поддубный.
Даврил уртакьтурал укун лахъсса кьимат бищаву цанма Оьмардунгу бусрав хьухьунссар, жугу ххари хьуру жулва кказитралгу хьхьичIунсса дус сийлийсса премиялун лайкь шаврия. Дакьаврилми давурттая бакъа уттиния тинмай буслан къабагьаннав, цIу-цIусса ххувшавуртту ва тIайлабацIу вил ххуллул гьалмахтал хьуннав, журналистикалувусса жул гъалбарцI, Оьмар!
ПатIимат Рамазанова
