Ттигъанну Лакрал райондалул бакIчи Юсуп МахIаммадов хьунаавкьунни Аьрасатнал Виричунал цIанин лайкь хьусса 13-ма дагъусттанчу МахIаммад Исбакиевлул ниттищал, Маринащал.
ДакIнин бутанну, декабрьданул 9-нний, Буттал КIанттул Вирттаврал кьини Аьрасатнал президент Владимир Путиннул Кремлилуву Виричунал Мусил ЦIуку буллуссар МахIаммад Исбакиевлул ниттихьхьун ва щащарнихьхьун.
Виричунал ниттил дакIнин бивчунни арснал оьрчIнийсса лахIзарду, бувсунни аьралий къуллугърая. Виричунал махъ ливчIун бур щащар ва ххюра шинавусса душ.
Юсуп МахIаммадовлул бувсунни Виричунал аьпалул ултти тIитIин дакIний бушиву Гъумук ва ниттил шяраву ЧукIнав.
– Жува аьркинссар Вирттаврал аьпа буруччин, ялун нанисса никиран миннал цIарду ва миннал дурсса виричушивуртту кIулну дикIаншиврул», – увкунни Юсуп МахIаммадовлул.
МахIаммад Исбакиевлул гъан-маччаминнахь жижарагу бувну, Юсуп МахIаммадовлул барчаллагь увкунни ниттихь хIакьсса Виричу тарбия аврихлу. Оьвкунни ванийн Гъумукун хъамалу. Цув мудангу хIадурну уссара увкунни Виричунал кулпатрал чIарав ацIан.
Зулайхат Тахакьаева
